Астананың Россия фән һәм мәдәният үзәгендә Бөек Җиңүнең 70 еллыгын бәйрәм итү кысаларында советлар Союзы Герое, татар шагыйре Муса Җәлилне искә алу кичәсе үткән. Чараны Казакъстандагы Бәйсез Дәүләт Бердәмлеге, чит илләрдә яшәүче ватандашлар һәм халыкара гуманитар хезмәттәшлек эшләре буенча федераль агентлык, Казакъстан татарлары һәм башкортлары ассоциациясе һәм «Дөнья хатын-кызлары дуслыгы үзәге» ярдәме белән «Дуслык» Татар мәгариф мәдәни үзәге оештырган.
Кичә традиция буенча татарларны рәсми булмаган гимны - Габдулла Тукайның «Туган тел»е белән башланган.
Сугыш һәм хезмәт ветераннары, Астана этномәдәни һәм иҗат интеллигенциясе вәкилләре каршында Казакъстандагы Бәйсез Дәүләт Бердәмлеге, чит илләрдә яшәүче ватандашлар һәм халыкара гуманитар хезмәттәшлек эшләре буенча федераль агентлык вәкиллеге җитәкчесе Виктор Нефедов һәм «Дуслык» Татар мәгариф мәдәни үзәге рәисе Җәннәт Низаметдинова чыгыш ясаган.
Кунакларны Бөек Ватан сугышында Җиңүнең 70 еллыгы белән котлап, Җәннәт Низаметдинова сугыш һәм тыл ветераннарына Татарстан Республикасы Президенты вазифаларын вакытлыча башкаручы Рөстәм Миңнеханов исеменнән котлау откырткаларын тапшырган.
Рәсми өлештән соң чараның алып баручысы һәм режиссеры ролен башкарган журналист Ринат Дусумов татар шагыйренең фаҗигале язмышы турында сөйләгән. Аннары шагыйрьнең иң танылган шигырьләре укылды һәм аның сүзләренә язылган җырлар башкарылган.
Оештыручылар сүзләренчә, кичәнең мәртәбәле кунагы, Бөтендөнья татар конгрессы башкарма комитеты әгъзасы, язучы Тәүфыйк Кәримов чараның югары дәрәҗәдә узуын билгеләп үткән. Җыелучыларны Бөек Җиңүнең 70 еллыгы белән котлап, ул да М.Җәлилнең берничә әсәреннән өзекләр укыган.
сылтама:
http://tat.tatar-inform.ru/news/2015/05/15/109380/
Комментарий юк