75 нче яшендә Екатерина Градова арабыздан китте

Актрисага 74 яшь иде. Легендар "Семнадцать мгновений весны" фильмындагы радистка Кэт роле аңа танылу алып килде. Екатерина Градова тамашачыларга шулай ук "Место встречи изменить нельзя" фильмындагы роле, театрдагы төрле матур образлары аша да яхшы таныш.

Актриса турындагы кайгылы хәбәрне ТАССка Кинематографистлар союзы Гильдиясе директоры Валерий Гущин хәбәр иткән.
Екатерина Градова 1946 елның 6 октябрендә Мәскәүдә архитектор Георгий Градов һәм Гоголь исемендәге театр актрисасы Раиса Градова гаиләсендә туган. Мәскәү чит телләр институтын һәм МХАТ мәктәп-студиясен тәмамлаган. Артист Андрей Мироновка кияүгә чыккан. Кызлары Мария Миронова шулай ук кино һәм театр артисты. Екатерина Георгиевна 4 нче курста укыганда ук Маяковский исемендәге театр сәхнәсендә "Таланты и поклонники" спектаклендә баш рольне уйнап, талантлы актриса булуын күрсәтә. 20 театраль куелышта, 8 телефильмда, 4 фильмда катнаша. 1982 елда Халыклар дуслыгы ордены белән бүләкләнә. РСФСРның атказанган артисты.
Россия мәдәният министры Ольга Любимова Екатерина Градованың мәдәниятебезне баетуга керткән зур өлеше, "Семнадцать мгновений весны" фильмында Кэт ролен башкарып халык мәхәббәтен яулавы турында кабат искә төшереп, тирән кайгысын белдерде.