КАЙДА, КЕМ, НИЧЕК?

Суүсемнәр. Японнар суүсемнәрне ашларга да сала, салатка да куша, суши, ролл дигән ризыкларын да суүсемгә төрә. Анда май юк диярлек, протеиннар, витаминнар, йод бар. Суүсемнәр матдәләр алмашын тизләтә, кандагы шикәрне киметә.
Киңәш: диңгез кәбестәсе, помидор, суган, зәйтүн җимешеннән салат ясагыз да, зәйтүн мае белән тәмләтеп җибәрегез.

  Кырку ризыклар. Кариб диңгезе утрауларында ачы, кырку ризыклар яратучылар яши. Чили борычы, табаско (соус) ише үтеңне сытарлык тәмләткечләр матдәләр алмашын «кыздырып» җибәрә дә, калория дигәне бик тиз янып бетә икән. Андый тәмләткечләр иммунитетны бик тә яхшырта.
Киңәш: татлыны кырку белән аралаштыр. Мәсәлән, тавык итен чили борычы һәм ананас белән аша.

  Кузаклылар. Тунис гарәпләренең табынын ку­зак­лылардан башка күз алдына да китереп булмый. Чөнки ногыт, борчак, фасоль ише кузаклыларда май юк, ашкайнатуны яхшырта торган җеп­селле мат­дә­ләр байтак. 
Киңәш: борчак, фасоль ашын еш­рак пешер, салатка яшел борчак куш.

  Арыш сохарие. Финнар кетердәгән ипи ашарга яраталар. Дөрес эшлиләр бит, әй! Юка гына итеп киптерелгән арыш ипие телемнәре эчәкләрнең эшчәнлеген яхшырта, кандагы шикәрне киметә. Җитмәсә, туклыклы да икән бит әле.
Киңәш: эремчекле сыр яки майсыз эремчек янына сохари куй.
Ре­­дис, тавык түше, кыяр белән дә сохари аша. 

  Карри. Һиндстанда каррилы һәр катнашма­ның аерым бер тәме бар. Ул тәмләткечләрнең барысы өчен дә уртак нәрсә – чили борычы, кара борыч. Алар аппетитны киметә, матдәләр алмашын яхшырта.
Киңәш: карри майсыз ит белән, мәсәлән, тавык ите белән әйбәт бара.

  Чи яшелчә белән туклану. Испан кызлары күп итеп яшелчә ашарга яраталар. Пешмәгән яшелчәдә кало­рияләр бик аз була. Мае да юк, витаминнары да күп. 
Киңәш: туклыклы матдәләр кыт-лыгы башланмас өчен ярма ризыклары, йогуртлар да ашарга онытма.
Бездә катык инде ул. 

  Педаль әйләндер! Голланд кыз-лары артык авырлыкны велосипед ярдәмендә киметә. Велосипедта акрын тизлектә берәр сәгать йөреп кайту да 380 килокалорийны
ян­­дыра. 
Киңәш: көн саен велосипедта йөргән кешеләр сирәгрәк авырыйлар.

  Зәйтүн мае. Тәза яшелчә-җимеш, сөт ризыклары, балык, аз-маз гына ит – менә шушы инде греклар табынында. Зәйтүн мае да шушы исемлектә. Зәйтүн мае тәнгә үргән майны яндыра, калорияләрне эшләтә. Кандагы шикәрне дә киметә.
Киңәш: ризык әзерләгәндә зәйтүн, йә рапс мае файдалан.

  Яшел чәй. Кытайлар ярата торган яшел чәй ярдәмендә бик тиз ябыгырга мөмкин. Яшел чәй составындагы матдәләр тәнне җылытып җибәрә, шуңа күрә калорияләр сарыф ителә.
Киңәш: су кайнап чыккач, берка­дәр сүрелсен. Ике минуттан соң гына суны чәй өстенә кой. Өч минут пешсен чәең.