Өйнең атмосферасын үзгәртүче биш әйбер 

Яңа елның озын ялларында – вакыт барында – өйне бераз үзгәртәсе килә бит ул. Аеруча, без, хатын-кызлар, бу эшне бик яратабыз. Күп акча чыгармый гына, өйдә рәхәт атмосфера тудыруның, энергетикасын үзгәртүнең берничә юлы бар. Шушы биш арасыннан бер-икесен генә сайлап алсагыз да, бүлмәгез бөтенләй икенче булып китәр. 

Ут 

Ут стихиясе – җылылык һәм яктылык дигән сүз. Әлеге стихиягә бәйле әйберләр әйләнә-тирәлекне начар энергиядән арындыра. Аларны һәркем үз кесәсенә һәм ихтыяҗларына карап сайлый. Электр белән эшли торган камин да булырга мөмкин ул. Андый камин эстетик матурлык кына тудырмый, өйгә җылылык та өсти. Күз алдына гына китерегез: кышкы салкын кичтә каминыгызны кабызып, бер чынаяк кофе белән каршысына килеп утырасыз. Мондый каминны зур бүлмәгә, көньяк стенага урнаштырсаң яхшырак. 

Камин алырга ниятегез булмаса, күп итеп шәмнәр кабыза аласыз. Аларны махсус киштәгә берничәне урнаштырсагыз, матуррак. Размерлары төрлечә дә була ала. 

Тәрәзәләр 

Тәрәзәләр аша йортыбызга энергия керә һәм чыга. Әгәр дә йортыгызда тәрәзәләр аз икән, аларны калын пәрдәләр, зур гөлләр белән капламаска тырышыгыз. Тәрәзә янына авыр җиһазлар да урнаштырмагыз. Юка гына челтәр пәрдә эленгән, ялтырап торган тәрәзәләрдә бәхет чагыла. Тәрәзә төбен ял итү урынына әверелдерергә мөмкин: бер-ике кечкенә мендәр, җылы пледлар, матур лампа гына кирәк бит... 

Көзгеләр 

Һәрберебезнең дә өендә көзгеләр бар. Ләкин алар дөрес урнаштырылганмы? Чөнки көзгедә нәрсә чагылганы бик мөһим. Өегездә кеше үзен тулы буйга карый ала торган бер зур көзге булсын. Аны алгы бүлмәгә урнаштыру урынлырак. Әмма өйгә кереп-чыгып йөри торган ишеккә каршы булмасын ул, югыйсә өегезнең энергиясе чыгып китәчәк. Көзгедә нәрсә чагылганына да игътибар итегез. Әгәр дә аның каршысында буш стена икән, анда берәр матур картина элегез. 

Тар һәм караңгы бүлмәләрне көзгеләр ярдәмендә зурайтып, яктыртып җибәрергә мөмкин булуын белә идегезме? 

Сувенирлар, сыннар 

Өйдәге сувенирлар һәм сыннар хуҗалар турында бик күпне сөйли ала. Һәрбер өйдә берничә генә булса да андый матур әйберләр булырга тиеш. Ләкин артык күп сыннар, эреле-ваклы сувенирлар энергия агышына комачаулый. Бөтен кешегә дә күренерлек урынга аларның иң кадерлеләрен генә урнаштырыгыз. Сувенирларның да үз теле бар. 

Бака – байлык билгесе. Ташбака – озын гомерлелекне белдерә. Аҗдаһа – уңыш юрый. Җилпәзә – саклык символы. Фил – көч билгесе. 

Фонтан, аквариум 

Өйдә су стихиясе дә чагылырга тиеш. Ул энергия балансын көйләүче. Су белән бәйле объектларны өйнең төньягында урнаштыру яхшырак. 

Су стихиясен нинди объектлар гәүдәләндерме? Иң популяры – аквариум. Аның формасы төрле булырга мөмкин, ә балыклар саны бәхет санына тәңгәл булсын – 1, 4, 6, 9. Араларына алтын балыклар да җибәрегез. Алтын балык өйгә муллык китерә дигән ышану бар. Күңелегез тынычсыз чакларда аквариум каршысына килеп утырып, талгын гына йөзгән балыкларга карау, беләсезме, ничек тынычландыра! 

Аквариумга күңелегез ятмаса, сатуда бәләкәй генә фонтаннар бар. Утка экономия булсын дисәгез, аны гел кабызмагыз, күңелегез теләгәндә генә. Фонтандагы агым су өйнең энергетикасын да хәрәкәткә китерә. 

Реклама