Бергә-бергә шактый юл үткән тузанлы чемоданны күтәреп, вахтер янында басып торам. Имтиханнар вакытында шушы тулай торакта яшәгәнлектән, бераз кыюлык бар. Вахтер хатын йокылы-йончыган күзләрен кыса төшеп, минем институтка кабул ителүем турындагы язуны карый. – Иртәгегә кадәр кайда буш урын тапсаң, шунда кунарсың. Урын-җир октябрь башында, авылдан эштән кайткач кына бирелә, – ди ул. Мин эчкә үтәм. Кул үзеннән-үзе хатлар өелеп яткан өстәлгә үрелә. Мең кул аша үтеп таушалып беткән конвертлар арасында миңа насыйбы күренми.
