Безнең класста бер кыз бар иде. Белмим ничек шулай булды – барыбыз да аны класстагы иң чибәр кыз дип саный идек. Барыбызның да аның белән дус буласы килә. Ә ул бүген кемнәр белән дус буласын кәефенә карап үзе сайлый. Кәефе булмаса, арадан беребезне «дошман» ясый. Әлеге «дошман» белән класстагы бер генә кыз да сөйләшмәскә, уйнамаска, аның белән бер партада утырмаска тиеш. Икенче көнне «дошман» алышына – аның урынына башка кыз сайлана.
