Айнытабыз 

 Бу хакта сүз күптән бара иде инде. Тик менә аның түләүле булуы гына... 

Шунсыз булмый. Айныткычсыз яши алмыйбыз. Дәүләт Думасы депутатлары шундый фикергә килде. Закон проекты беренче укылышта инде кабул ителде дә, чөнки ел саен бу каһәр чирдән 50 мең кеше дөнья белән хушлаша. Шуларның 10 меңе урамда өшеп үлә. 

Гаиләнең тынычлыгын алучы, аны таркатучы, балаларны шәхес буларак, тәмам «эштән» чыгаручы, куркыныч җинаятьләргә этәрүче шул бит инде... аракы. Эчүгә сабышкан кешене тиз генә аякка бастырам димә. Үзендә көчле теләк кенә булмаса... Алкоголизм дәвалап булмый торган чир дип күпме яздык лабаса. Моны бит күпне күргән, белгән наркологлар әйтеп тора. Исерекне айнытырга гына түгел, озак вакытлар дәваларга да кирәк. Түләүле булган ул айныткычларда (акчасыздан акча каеру өчен тагын бер сәбәп) бу проблеманы хәл итә алырлармы? Әлбәттә, мин һич тә айныткычлар кирәкми дип әйтмим. Кирәк! Әмма тәүлегенә 3 мең сум түләп, исерекнең бик сирәге генә кереп ятарга ризалашыр. Дөрес, урамда аунап ятканнарны полиция хезмәткәрләре җыячак, диләр. Хикмәт шунда ки, урамда аунау хәленә төшкән исеректә акча каян булсын? 

Ни өчен соң ул айныткычлар түләүле булырга тиеш? Ни өчен дәүләт тормыш төпкеленә төшеп баручыларга үзенең мәрхәмәтле кулын сузмый? Әйе, бүген медицинаның бушлай түгел, түләүле булуы берәүгә дә сер түгел. Медицина өлкәсендәге яңарышлар, алга киткән технологияләр... барысы, барысы да бай кесәлеләр өчен икәнлеген дә беләбез. Ләкин биредә сүз җәмгыятьнең әкренләп таркала баруы турында. Гаиләләр таркала икән, ул без яшәгән мохитне дә тарката, агулый. Айныткычларны түләүле итү илдәге вазгыятьне үзгәртә алырмы икән диюем.