Без татар халкының талларга мәхәббәте зур. Яр буендагы бөдрә таллар турында никадәр җыр бездә! Ә бит суга ятып елаган хисчән таллар йөрәккә генә түгел, тәнгә дә шифа бирә.
Ак тал кайрысының төп актив матдәсе — салицин. Ул организмда салицил кислотасына әйләнә. Тал кайрысы хәзерге аспиринның табигый аналогы булып санала.
Борынгылар ак тал кайрысын авыртуны басу, бизгәкне дәвалау, температураны төшерү һәм ялкынсынуны киметү өчен кулланган.
Ак тал кайрысы баш, мускул, буын авыртуларын басарга сәләтле.
Артрит, ревматизм белән авырганда хәлне җиңеләйтә.
Ак тал кайрысының кайнар төнәтмәсе температураны төшерә, тизрәк савыгырга булыша. Эчәклек, авыз эче, казналыктагы ялкынсынуларны баса.
Йөрәк-кан тамырлары өчен файдалы, гипертония белән интеккәннәргә тәкъдим ителә.
Антиоксидант үзлекләре билгеле.
Иммунитетны көчәйтә.
Артрит һәм остеоартрозлар вакытында тал кайрысыннан буыннарга компресс куялар һәм төнәтмәсен эчәләр.
Тал кайрысының мигреньне – түзә алмаслык баш авыртуын баса алуы билгеле. Кайнар төнәтмәсе баш авыртуын бик тиз бетерә.
Салкын тигәндә халык имчеләре тал кайрысын төнәтеп эчергән.
Тире авырулары: экзема, дерматит, псориаз булганда да тал кайрысының төнәтмәсе белән юыну файдалы.
Тал кайрысы төнәтмәсе тынычландыра, неврозларны дәвалаганда шифа бирә.
Аякларында кан тамырлары бүртеп (варикоз) аяклары шешенгән һәм сызлаган кешеләргә тал кайрысы төнәтмәсенә аякларын тыгып утырырга киңәш ителә. Ул аякның сызлавын киметә.
Ангина вакытында тал кайрысы төнәтмәсе белән тамакны чайкатсаң, шеше тиз кайта, тамакның ялкынсынуы басыла.
Тал кайрысы канны туктата. Аны киптереп, порошок хәленә китереп төяләр һәм кан саркыган яраларга сибәләр.
Тән тиресе бозылса, үлекле бетчәләр, чуаннар чыкса, тал кайрысы порошогын атланмай белән кушып ясаган мазь булыша.
Чәчләр коелса, кавык интектерсә, баш тиресе кычытса, башыгызны тал кайрысының куе төнәтмәсе белән юыгыз. Бу бик үтемле чара. Төнәтмә ясаганда әрекмән тамырын да кушсагыз, бигрәк тә шифалы.
Тал кайрысы төнәтмәсен әзерләү өчен: 1 аш кашыгы киптереп вакланган кайрыны 2 стакан суга салып, 4 сәгать каплап тоталар. Аннары сөзеп, ашарга 20 минут кала көнгә 2-4 тапкыр яртышар стакан күләмендә эчәләр.
Тал кайрысының порошогын гына да кулланырга була. Аны шулай ук ашарга 20 минут кала көнгә 3 тапкыр 1 г күләмендә кабалар.
Тагын бер ысулы: 60 г вакланган кайрыны 1 литр салкын суга салып, сүрән утта 15 минут кайнаталар. Уттан алып, калын тастымал белән төрәләр һәм бер тәүлек шулай тоталар. Аннары сөзеп, ашар алдыннан көнгә 4 тапкыр яртышар стакан эчәләр. Борынгы имчеләр шулай сары авыруын (гепатит) дәвалаганнар.
Урта Азиядә эссе суккан кешене тал яфраклары белән төреп куя торган булганнар.
Тал кайрысын иртә язда, бөреләр ачылганчы җыялар. Аны агачның кәүсәсеннән түгел, ботаклардан гына салдырып җыярга кирәк.
Тал кайрысын куллана башлаганчы, табиб белән сөйләшегез. Аспиринга аллергия булганнарга аны сак кулланырга кирәк.
Следите за самым важным и интересным в Telegram-каналеТатмедиа
Комментарий юк