Кабакның файдасы

Кабак тәмле генә түгел, бик файдалы да. Бездә күпләр аннан йөз чөерә. Юкка. Әгәр файдвлы үзлекләрен белсәләр, кабакны ешрак кулланырлар иде.

• Кабак орлыклары 50 процентка майдан тора. Әлеге май С, В1 витаминына бай. Кабак йомшагында А элатерицины, С, В1, В2 витаминнары, никотин кислотасы, каротин һәм каротиноидлар бар.

• Кабак орлыгы элек-электән эчтәге суалчаннарны куар өчен кулланылган. Шул ук вакытта ул организм өчен агулы да түгел.

• Кабак төше бәвел куыгы мускулларын ныгыта, бәвел куыгының ялкынсынуын баса.

• Ир-атларда простата бизе ялкынсынса, шуңа бәйле рәвештә бәвел чыгару кыенлашса, шулай ук кабак төше ярдәмгә килә.

• Борынгылар кабак йомшагы һәм кабак төше белән бавыр чирләрен дәвалаган.

• Кабак йөрәк-кан тамырларын ныгыта, азканлылыкны дәвалаганда шифа бирә.

• Өлкәннәр гадәттә эч кибүдән, эчәклек эшләмәүдән интегә. Андый вакытта кабакны күбрәк ашарга киңәш итәләр. Ул эчәклекнең моторикасын яхшырта.

• Чи кабакның согын сыгып, бәвел чыкмаганда эчәләр. Ул менә дигән бәвел кудыргыч булып санала. Аяклар шешенгәнне киметергә булыша. Организмны артык судан арындыра.

• Кабакта калий тозлары күп. Шушы үзлеге аны тире авыруларын дәвалаганда шифалы итә. Кабакны күбрәк кулланганда тире авырулары азынмый.

• Суалчаннарны чыгару өчен кабак төше түбәндәгечә әзерләнә: 300 г чистартылган кабак төшен (эчендәге яшел элпәсен калдырырга кирәк) киледә төяләр. Шуңа 50–60 мл су, 50 г бал өстиләр. Барысын бергә катнаштырып, ач карынга бер сәгать дәвамында ашап бетерәләр. 3 сәгатьтән соң эч сыеклый торган дару эчәргә һәм клизма куярга кирәк.

• Кабак төшен болай гына ашаганда да аның файдасы бар.