Аллергияле балалар өчен зарарсыз Яңа ел табыны

Белгеч: Ольга Владимировна Тарасова – медицина фәннәре кандидаты, Пирогов университетының Аналар һәм балачак институты госпиталь педиатриясенең икенче кафедра доценты.

Яңа ел аллергияле балалар өчен нигә куркыныч?

Аллергияле баланың иммун системасы даими рәвештә «югары әзерлек» халәтендә. Ә Яңа ел табыны – аның өчен чын сынау.
 

Төп сәбәпләр:

Ят ризыклар. Гадәттә, ярый дип саналган – гиппоаллерген ризык та стресс чорында реакция китереп чыгарырга мөмкин.

Җыелма эффект. Аерым килеш ашаганда үзләштерелгән ризык та салатларга кушылгач, аллергик реакция бирергә мөмкин.

Яшертен аллергеннар. Соуслар, ярым фабрикатлар, татлы, баллы ризыклар, төрле консервантлар – болар барысы да аллергия бирә торган гистаминолибераторлар.

Аллергияле балалар өчен Яңа ел менюсының
өч кагыйдәсе

1. «Зарарсыз могҗиза»: бала өчен аерым бәйрәм оештырыгыз

Баланы бәйрәмнән мәхрүм итмәгез, киресенчә, бәйрәм атмосферасы тудырыгыз.
Балага үзенең Яңа ел тәлинкәсен әзерләгез – рөхсәт булган ризыклардан матур итеп бизәп. Ул диета ризыгы булып түгел, ә чын бәйрәмчә сый булырлык итеп.
Яңа берәр ризык кертү кагыйдәсе. Аны бәйрәмгә 3-5 көн кала, иртән һәм аз күләмдә генә кертегез. Яңа ел төнендә эксперимент ясау кирәкмәс..

2. Зарарлы классик булган ризыкларга файдалы альтернатива

Салатлар:
«Кар бөртеге»: пешкән чәчәк кәбестәсе, бәрәңге (аллергия булмаса), яшел алма, татлы булмаган йогурт.
«Кышкы әкият»: пешкән күркә яки куян ите, кишер, брокколи, зәйтүн мае.

Десертлар:

• Глютенсыз ярмадан һәм кипкән җимешләрдән ясалган «кар бөртекләре».
• Өйдә әзерләнгән алма-груша мусслары.
• Пешкән алма (аллергия тудырмаса, дарчин белән).
• Эчемлекләр:
• Кипкән өрек, караҗимеш компоты.
• Кайнаган су кушылган ак карлыганнан морс.
• Яшел алма телеме белән газсыз су.

3. Бәйрәмнең асылы ризыкта түгел

Бала өчен иң мөһиме – бәйрәм атмосферасы. Өйне бизәү, төрле уеннар, костюмнар, бүләкләр – алар өчен болар чын Яңа ел могҗизасы. Нәкъ менә шуларга басым ясап, менюның аерым булуын бала сизми дә калачак.

Катгый тыелган ризыклар

Аллергияле балалар өчен Яңа ел табынында түбәндәгеләрнең  булмавы зарур:

• майонез, кетчуп һәм башка төрле сатып алган соуслар;
• колбаса, сосискалар, ысланган азык-төлек;
• шоколад, бал, чикләвекләр, цитруслы җимешләр (аллергенлы булса);
• экзотик җиләк-җимешләре (киви, манго, бакча җиләге – виктория);
• азык буявы кушылган ризыклар.