Аяк табанында сөялләр: сәбәбе һәм нәтиҗәсе

Бу күбесенчә өлкән кешеләргә яки аягөсте күп йөрүчеләргә генә кагыла дип уйлау да хата. Сөял утырып кына эшли торган һөнәр ияләрендә дә була дисәк, гаҗәпләнәчәксез.

Республика клиник тире һәм венерология авырулары диспансерының 
табиб-дерматологы, табиб-венерологы  Наталья КАПРАЛОВА

Нилектән барлыкка килә?

Табан астына сөялләр чыгу, бармак асларында, үкчәдә тапталган урыннар барлыкка килү организмның саклану реакциясе ул. Артык күп ышкылу, зур басым нәтиҗәсендә тире зарарланган урынны ул шул рәвешле үзенчә сакларга тырыша – аны калынайта. Йомшак сөялләр күпчелек очракта размеры туры килми торган, җайсыз, кысан аяк киемнәре кию аркасында барлыкка килә. Артык авырлык, умыртканың кәкрәюе, яссытабанлылык, бер позада аягөсте озак басып тору да сөялләр чыгуга сәбәп була.
Болардан тыш, табан астына каты һәм очлы сөялләр дә чыга. Болар – кеше папилломасы вирусы аркасында тиредә барлыкка килгән шешләр. Йомшак сөялләрдән аермалы буларак, алар бик йогышлы. Чит кешенең аяк киеме, сөлгесе, мунчаласы аша, җәмәгать мунчасы
яки бассейнда яланаяк йөргәндә әлеге вирусларны бик тиз йоктырырга мөмкин.

Ничек дәваларга?

Табан астына чыккан сөялләрне һәм тиренең калынайган урыннарын өй шартларында дәваларга киңәш итмәс идем. Тиешле шартларны үтәмәсәң, тирегә инфекция кереп, ялкынсынуы, үлекләве ихтимал. Ә менә озак ышкылганнан сулы сөял чыкса, аны спиртка манылган энә очы белән тишеп, зеленка яки йод тидереп куярга мөмкин, ләкин бу очракта да бик сак булырга, инфекция кертмәскә кирәк.
Табандагы каты сөялләрне һәм тапталган урыннарны дерматолог дәва­лый. Хәзер криотерапия, лазер, радиодулкынлы терапия ысуллары кулланыла.
Тире артык зарарланмаган булса, консерватив дәва ысуллары да ярдәм итә. Боларга тирене йомшарта торган кремнар, аякларны җылы суга тыгып йомшарту, калынайган тирене пемза яки махсус аппарат белән чистарту керә.
Ләкин сөялләрне бетереп тә, гел шул җайсыз аяк киеменнән йөрсәң, ул кабаттан чыгачак.

Сөялләрне ничек кисәтергә?

• Аяк киемен дөрес сайларга. Ул тар һәм җайсыз булмаска тиеш. Табан астындагы, аяк бармакларындагы тиренең зарарлануына иң элек аяк киеме сәбәпче.
• Табаннарга ял бирергә онытмагыз. Бигрәк тә биек үкчәле яки тар башлы туфлиләр кияргә яратсагыз, көн дә­вамында берничә тапкыр туфлиләрне уңайлы аяк киеменә алыштырып торыгыз.
• Аякларны юганнан соң, төнгә каршы составында мочевина булган кремнар сөртегез. Мочевина тирене йомшарта.
• Тиренең калынайган урыннарын әледән-әле пемза белән ышкып йомшартыгыз.
• Вируслы сөялләрне йоктырмас өчен, шәхси гигиенаны саклагыз. Җәмәгать мунчаларында, бассейннарда яланаяк йөрмәгез, чит кешенең аяк киемен, сөлгесен, мунчаласын, пемзасын кулланмагыз. Тренажер залларында шөгыльләнсәгез, кулланыр алдыннан тренажерларны бактерия­ләрдән йогышсызландыра торган препарат белән сөртегез.

Бу мөһим!

Авыртмый икән, сөялләрне дәваларга кирәкми дип уйламагыз. Табан астына сөял чыгу сәламәтлеккә, аяк киеменә, гигиенага, яшәү рәвешенә игътибарлырак булырга кирәген кисәтә.