“ТатМузТВ” 4нче тапкыр премия өләшә

- Быел рекордлар  сезоны! “ТатМузТВ” премиясен тапшыру тантанасында 45 номинация, 48 номер, 55 җырчы, 10 дуэт булачак, - дип игълан итте оештыручылар .  

Әлеге 6 сәгатьлек грандиоз тамаша 23 мартта гадәттәгечә  Казанның “Пирамида” күңел ачу үзәгендә узачак.  

Кызыл келәм дә, юмор да, күпмедер дәрәҗәдә интригалар  да булачак. Тик бу юлы кызыл келәм урамнан ук түгел, ул “Пирамида”ның эченә  түшәләчәк, чөнки язгы суыкта артистлар матур күлмәкләре өстеннән пальто, курткалар киеп үтәргә мәҗбүр була һәм кыйммәтле, затлы күлмәк-костюмнары күренми кала икән. 

“Барс Медиа” ширкәтенең башкарма директоры Динә Гәрәева әйтүенчә, ТMTV премиясе яшь җырчыларга стартап бирү өчен дә кирәк. “Бүгенге эстрадада җырчылар күп димәгез, бу тенденциягә, киресенчә, уңай карарга кирәк”, - диде ул журналистлар белән очрашу вакытында.  



Журналистлар белән очрашу “Корстон”дагы бер барда узды, ул гадәттәгедән аерылып торды. Беренче өлешендә оештыручылар тамаша турында мәгълүматлар бирде, икенче өлешен интреактив форматка кордылар.  

Быелгы тамашаның режиссеры - “ТатМузТВ” каналының баш мөхәррире Алмаз Гыйльметдинов. Бу аның дебют эше. Сценарий авторы – Рамил Шәрәфиев. Алып баручылар да алты: Гөлназ Сәфәрова, Айваз Садыйров, Рамиль Шәрәфиев, Иркә, Айрат Ильясов, Рамиль Шарапов.  

“Бу республика күләмендәге та-ма-ша, - диде Гөлназ Сәфәрова. - Без экспериментлардан курыкмыйбыз. Һәр елны тамашага нинди дә булса бер мәгънә өстибез. Быел исә эстраданың тылын – композиторларны, текст авторларын сәхнәгә чыгарачакбыз. Шәп булачак! дип йөз процент ышанып әйтә алабыз. Бу чын мәгънәсендәге шоу  - мин бу сүздән курыкмыйм һәм ул истә калачак”.  



Очрашуның интреактив өлешендә журналистлар һәм номинантларның кайберләреннән (Гүзәлем Һәм Салават Миңнеханов, Вадим Захаров, Ландыш Нигъмәтҗанова, Алсу Әбельханова, Рамиль Шарапов) торган командалардан “Җырлаоке” форматына охшашлы ярыш оештырылды. Өч турда да татар эстрадасының җырларын һәм җырчыларын танырга кирәк иде. Журналистлар командасы кайберләрен белгән, кайберләрен танымаган өчен җиңде. Очрашу истәлеккә фотога төшү белән тәмамланды.  



фото: Салават Камалетдинов