Милли музыкаль премия сатыламы?

«Болгар» радиосы VII милли музыкаль премиясен бирү тантанасы ул – елга йомгак ясау. Радио тыңлаучылар әлеге концертны әнә шулай дип кабул итә. Монда танылган артистлардан битәр, эстрадада яңа гына баш калкыта башлаган җырчылар чыгыш ясап, премиягә ия булачак. Алар барлыгы – 36. Номинацияләр дә шул санда. «Кайнар хит» җиңүчеләреннән кала, ел дәвамында «Болгар» радиосында еш соралган һәм халык күңеленә кергән җырларны башкаручылар да «Алтын йолдыз» сынына ия булачак. 

«Милли музыкаль премия сатылмый», – диде радионың баш мөхәррир- продюсеры Илфар Кәримов журналистларның әнә шуңа ишарә итеп бирелгән соравына. «Таланты булмаса, никадәр акча түләргә теләсә дә, эфирга кертмибез», – ди баш мөхәррир. Аның сүләренә караганда, ротациягә алып килгән сыйфатсыз җырларны борып җибәрәләр. Ә  җырчылар өчен радио эфирларга үтеп керү бик мөһим, чөнки тамашачыга җыр иң элек радио-телевидение эфирлары буенча таныла. Соңыннан гына ул труппа җыеп, гастрольләргә чыгып китә. Шуңа да мондый фестивальләр уздырылуга алар бик шат, бигрәк тә яшь җырчылар, чөнки исем ясала. Быел беренче тапкыр сын алучы Рузилә Хәертдинова горурлануын белдерде: «Үзебезнең татар моңнары телне, мәдәниятне саклап кала», – диде.

 
 «Болгар» радиосы VII милли музыкаль премиясен бирү тантанасы Казанда үтә. Әлеге бренд астында чит төбәкләргә («Болгар» радиосын чит төбәкләр генә түгел, чит илләрдә дә тыңлыйлар) концертлар белән чыгарга уйламыйлар оештыручылар. «Ул Казанда гына уза, бу инде – традиция», – ди Илфар Кәримов. Дөрес, берничә ел элек Мәскәүдә концерт уздырганнар, лауреатлар белән тагын бер барып, тамашачыларын сөендерергә планнары юк түгел. 
 Концертны харизмалы Рөстәм Гайзуллин һәм алыштыргысыз Илфар Кәримов алып барачак. Алар янында бер чибәр ханым да булачак. Тик аның исемен әлегә сер итеп саклыйлар. Милли премия булгач, чибәр генә түгел, ана телендә матур итеп сөйләшә дә белгән алып баручы булыр дип өметләнәбез. 

Концертка килгән тамашачыларны бүләкләр дә көтә. Традиция буенча, музыкаль премиянең символы булган йолдыз-брошка тапшырачаклар. Быелның тагын бер үзенчәлеге – теләгән һәр кешегә бушка фотомагнитлар өләшәчәкләр. Фойеда куелачак фотозоналарда фотога төшү мөмкинлеге булачак.