Фирдүс Тямаев: "Балаларыгызны тикшерегез! Яшьләрнең 80 проценты әлеге проблема белән яши".

Җырчы Фирдүс Тямаев үзенең «Инстаграм» аккаунтында кичә бер зур проблема белән мөрәҗәгать итте. Бу сүзләрне ул инде күптән әйтергә теләп йөргән, шушы афәт аркасында өченче дустының үз-үзенә кул салуы, мөгаен, соңгы тамчы булгандыр. 

Фирдүс Тямаев: «Күптән бу видеоны яздырасым килгән иде. Бер проблема белән чыгам. Ул проблема бөтен дөньяны яулап алды. Бүгенге көндә яшьләр, өлкәннәр дә – 80 процент шушы проблема белән йөри. Ул игромания дип атала. Бүген иртән хәбәр килде, бер дустым үз-үзенә кул салган. Аңынчы инде ике дустым үз-үзенә кул салган иде. Әти-әниләр бүгеннән үк тикшерегез балаларыгызны, ышанып йөрмәгез. Телефон аркылы ставка куялар. Банк карточкасы аркылы кереп китәләр дә, шуның аркылы уйныйлар. Ул наркоманиядән дә начаррак нәрсә. Сизсәгез, балаларыгызга акырмагыз, сукмагыз, кул күтәрмәгез, бары тик җайлап, психологка алып барыгыз, мәчетләргә алып барыгыз. Ирләрегез уйнаган хатыннар, аерылышырга, аларны ташларга ашыкмагыз, чөнки ул уен кешене психик яктан зомбировать итә. Якын кешегезгә бурычка акча бирмәгез. Бурычка акча бирер алдыннан аның әти-әнисенә, хатынына әйтегез, алар бу хакта беләме? Бер-беребезгә ярдәм итсәк кенә без бу проблемадан чыга алабыз. Иң мөһиме: алар шундый ышандырырлык итеп әйтә, уйнамыйм, барысы да әйбәт, ди. Ышанмагыз. Кеше үзеннән-үзе транска керә. Ул бик начар әйбер. Аллаһы Тәгалә юлыннан чыкмагыз. Ул бик зур гөнаһ. Аның өчен җавап бирәсе бар. Әти-әниләрегез, гаиләгез, балаларыгыз турында уйлагыз».