Казан дәүләт мәдәният һәм сәнгать университетында бүген «Илһамият» республика бәйге-фестивале үтте. Ул татар халкының ике бөек шәхесе – Габдулла Тукай һәм Габдулла Кариевларның тууына 130 ел тулуга багышлап үткәрелде.
Сәнгатьле сөйләм бәйгесе университет һәм бу конкурсны оештыруда башлап йөргән театр институты, аның Салават Фәтхетдинов җитәкчелегендәге татар эстрадасы кафедрасы тарихында беренче мәртәбә узды. Бәйгедә 120-130лап бала катнашты. Казаннан гына түгел, Татарстанның башкалага якын районнарыннан: Чүпрәле, Чистай, Саба, Арча, Питрәчтән дә килделәр.
Фестиваль сәхнәсенә Тукайның якташлары, авылдашлары – Кушлавыч мәктәбе укучылары да күтәрелде. «Илһамият»нең идея авторы – Казан мәдәният университетының татар эстрадасы кафедрасы профессоры, Россиянең атказанган, Татарстанның халык артисты Эльмира ХАММАТОВА.
– Сәхнә теле укытучысы буларак, мине сүз сәнгате бик кызыксындыра, – диде ул. – Әмма фестивальгә барыбер куркыбрак тотынган идек. Гадәттә, апрель ае мондый чараларга бик бай була бит ул. Әмма гаризалар көтелмәгәнчә күп килде! Ярдәм итүчеләр дә табылды. Татарстан Республикасының Мәгариф һәм фән министрлыгы, Казан шәһәре мәгариф идарәсе, Татар интернетын үстерү фонды (җитәкчесе – Раил Гатауллин), Бөтендөнья татар конгрессының Казан шәһәре бүлеге (рәисе – Фәрит Мифтахов), Татарстан язучылар берлеге, Г. Кариев исемендәге театр җитәкчелеге, Мәрҗани мәчете ниятебезне хуплап каршыладылар.
Укучыларны бу бәйгедә катнашырга әзерләгән укытучыларга рәхмәт. Балалар шигъриятне белүләрен, Тукай шигырьләрен яратуларын күрсәтте. Аңлап, белеп сөйлиләр! Чыгыш ясаучылар арасында татар телендә шигырь сөйләүче рус балалары да булды. Шул ук вакытта алар Тукай шигъриятен рус телендә яңгыратып та үзләренең осталыкларын күрсәттеләр. «Илһамият» дәвамлы булсын!» – оештыручылар да, катнашучылар да фестиваль-бәйгедән шундый теләк белән таралышты.
Гөлнур САФИУЛЛИНА,
Комментарий юк