Туган телебезне югалтырга хакыбыз юк!

Бөтендөнья татар конгрессының VI съезды аның рәисе Ринат ЗАКИРОВның хисап доклады белән дәвам итте.

- Туган телебезнең язмышы бөтен җитдилеге белән безнең алга килеп басты, – диде ул. – Без хәзер ике юл чатында калдык кебек. Милләте сакланмаса, дәүләтебез кемгә кирәк?!

Татарлар төрки халыкларның мәдәниятен үстерүгә бәһаләп бетергесез өлеш керткән. Безнеке кебек мәдәният, сәнгать үрнәкләре, халык авыз иҗаты башка халыкларда сирәктер. Безнең Тукаебыз бар.

Тик ни өчен татар теленең кулланылу даирәсе бүген тарая бара? Бу бернинди кысаларга да сыймый. 

Сезнең һәрберегезнең көч-дәрте ташып тора. Шушы булган егәрегезне туган телебезне саклап калуга юнәлтерсез дип ышанам. Милләт язмышы безнең һәрберебезгә килеп кагыла. Әйе, милләтебезнең киләчәге өчен без барыбыз да җаваплы.

Ерак әби-бабаларыбызның телен югалтырга безнең хакыбыз юк!