ТУФАН МИҢНУЛЛИННЫ САГЫНЫП...

Татарстан Республикасы Дәүләт Советында ул көнне депутатлар түгел, мәктәп укучылары иде. Биредә халык язучысы, күренекле драматург, танылган җәмәгать эшлеклесе, ялкынлы публицист Туфан Миңнуллин исемендәге укытучылар һәм укучыларның III республика конференциясе узды.  Өч ел элек Казандагы Фатиха Аитова исемендәге 12 нче кызлар гимназиясендә  язучы Туфан Миңнуллинның иҗади мирасын, татар әдәбиятын, мәдәниятен һәм сәнгатен тирәнтен өйрәнү һәм популярлаштыру максатыннан оештырыла башлаган иде ул. Җыенны ТР Дәүләт Советының мәгариф, мәдәният, фән һәм милли мәсьәләләр комитеты, Мәгариф һәм фән министрлыгы, Казан шәһәре Мәгариф идарәсе, Бөтендөнья татар конгрессы Башкарма комитеты, Казан федераль университеты һәм Ф. Аитова исемендәге 12 нче кызлар гимназиясе оештырдылар. Быел проект тагын да зуррак масштабларда үтте. «Кызыл тышлы дәфтәрдән» дип аталган журналистик номинациядә 130 дан артык иҗади эшләр тишерелеп бәяләнде. Социаль-фәлсәфи фәннәр һәм гаммәви коммуникация институтының гаммәви коммуникация бүлеге һәм татар журналистикасы кафедрасы мөдире Васил Гарифуллин, Туфан Миңнуллинның кызы, Бөтендөнья татар конгрессы сайты мөхәррир-модераторы Әлфия Юнысова-Миңнуллина, «Сөембикә» журналының әдәби мөхәррире, Россия һәм Татарстан журналистлар берлекләре әгъзасы Эльмира Закирова, «ШәһриКазан» газетасы журналисты Линар Закиров жюри әгъзалары иде.
Туфан Миңнуллинның: «Кеше белән язылмаган кануннар идарә итәргә тиеш, аның эчке дөньясы, аның рухы... Җәмәгать, бу мәсьәлә бик җитди!» – дигән атаклы сүзләре быелгы конкурсның шигаре булып китте. Ул бу сүзләрне кайчандыр биредә, Дәүләт Советында әйткән булган икән. Бу хакта Дәүләт Советының мәгариф, мәдәният, фән һәм милли мәсьәләләр комитеты рәисе, Туфан аганың дусты һәм фикердәше Разил Вәлиев укучыларга җиткерде.   Гоумән, Разил Вәлиев Туфан Миңнуллин турында бик күп истәлекләр сөйләде. Республикабыз район һәм авылларыннан конкурска килгән балалар белән  Татарстан Республикасы Дәүләт Советы рәисе урынбасары, республика журналистлар берлеге рәисе Римма Ратникова да теләп аралашты. Аның чыгышында Туфан абыйны сагыну да, бүгенге журналистика проблемалары да, журналист һөнәре турында кызыклы фикерләр дә, яшь каләм ияләренә матур теләкләр дә яңгырады. 30 дан артык укучыга дипломнар, истәлекле бүләкләр тапшырылды. Беренче дәрәҗә диплом алучы кызларны көмеш беләзекләр, егетләрне  кыйммәтле ручкалар белән сөендерделәр.