«Сөембикә» журналында түгәрәк өстәл

«Сөембикә» журналы редакциясе түгәрәк өстәл артында гамьле әңгәмә – «Әдәби әсәрләрдә хатын-кызның урыны» дигән темага зур сөйләшү оештырды. Анда Татарстан Республикасы Дәүләт Советының мәдәният, фән, мәгариф һәм милли мәсьәләләр комитеты рәисе Разил Вәлиев, «Ак калфак» Бөтентатар хатын-кызлар иҗтимагый оешмасы җитәкчесе Кадрия Идрисова, «Сөембикә» журналының баш мөхәррире Ләйсән Юнысова, язучылар Зиннур Мансуров, Вакыйф Нуриев, Эльмира Шәрифуллина, Асия Юнысова һәм редакция хезмәткәрләре катнашты. Узган ел Бөтендөнья татар конгрессы Башкарма комитеты һәм Татарстан Язучылар берлеге «Татар җәмгыятендә һәм гаиләдә хатын-кызның урыны» дигән иҗади бәйге игълан итеп, бу актуаль теманы кузгаткан иде инде. Инде конкурс тәмам, җиңүчеләр билгеле. Түгәрәк өстәл артындагы сөйләшүдә әлеге конкурс нәтиҗәләре, гомумән әдәбиятта хатын-кыз образын чагылдыру буенча кызыклы фикерләр, бәхәсле мәсьәләләр яңгырады. Бу хакта журналның май саныннан тулырак укый аласыз.