«Салават күпере»ндә «боз кузгалган»

Казан артында Осиново бистәсе янында төзелеп ятучы «Салават күпере» микрорайоны – озак төзелүче төзелешләрдән булып чыкты. 2011 елда ниятләнелсә дә, төзелеш үзе 2014 елда гына башланган иде. Анда да эш бер кайнап, бер туктап, социаль ипотека программасы буенча үз фатирларын көтүчеләрне шактый борчылырга мәҗбүр итте. «Салават күпере» – 93 күпкатлы һәм күпфатирлы йорттан, мәктәп, балалар бакчаларыннан, үз поликлиникасыннан гыйбарәт кечкенә генә бер шәһәрчек рәвешендә төзелә. Кыш уртасында социаль челтәрләрдә, төзүчеләр, акча түләнмәүне сәбәп итеп, эш урыннарын ташлап китә башлаган, дигән хәбәрләр дә күренгәләнде. Гыйнвар аенда «Салават күпере»нә Татарстан Президенты Рөстәм Миңнеханов та килеп, төзелешне үз контроленә алган иде. Президентның сүз үтемле булды: бүгенге көндә «Салават күпере»ндә берничә йорт төзелеп бетеп, тапшырылырга әзерләнә. Йортларны төзеп куеп та тиз генә тапшыра алмауларының тагын бер сәбәбе: тапшырыласы йортларның сыйфатына хәзер таләпләрнең зур булуы. Халык күченеп яши башлаганчы, барлык җитешсезлекләр дә юк ителгән булырга тиеш, дип аңлатты бүгенге матбугат конференциясендә Татарстанның төзелеш министры урынбасары Илшат Гыймаев. 10-2,10-7, 11-4 нче санлы йортларда май-июнь аенда эшне төгәлләргә ниятлиләр. Әлегә анда тышкы эшләр, идән түшәү, буяу, плитка ябыштыру гына калып бара.

10-1, 10-3 нче йортларда тәрәзә һәм витражлар урнаштыру, вентиляция тартмаларын көйләү, керү-чыгу урыннарын төзү кебек эшләр башкарыла.
Быелның 7 апреленә биредә 2334 кеше эшләгән. Төзелеш тулы куәтенә бара һәм йортлар вакытында тапшырылачак дип ышандыралар. Йорт төзү белән генә түгел, балалар өчен мәктәп, балалар бакчалары булу да мөһим. Быелның май аенда мәктәп төзелешенә керешеп, ул киләсе елның 1 сентябренә төзеп тапшырыласы. Казан белән ике арада йөрүче автобус маршрутлары да яңадан каралачак. Президент ул хакта да күрсәтмә биреп калдырган.