Салават – Башкортстанның халык артисты!

Роберт Миңнуллин инстаграм битенә “Ниһаять!” дип язып куйган иде 

Бүген 25 март көнне Татарстанның халык, Россиянең атказанган артисты Салават Фәтхетдиновка Башкортстан Республикасының да халык артисты исеме бирелде. 

Татарстанның халык шагыйре Роберт Миңнуллин әлеге вакыйгага мөнәсәбәтле фикерләрен “Сөембикә” белән дә уртаклашты:
– Бездә исем бирүләр һәрвакытта да бертөрлерәк була. Кайбер җырчылар гомер буе да атказанган исеме белән йөри. Мәсәлән, Габдулла Рәхимкулов гомер буе диярлек атказанган исемен йөртте. Үләр алдыннан гына халык артисты исеме бирелде. Андый мисаллар җитәрлек. 

Өч җыр җырлап та атказанган исеме алганнар бар. Андыйлары да җитәрлек. Мин монда берәүне дә гаепләмим, исем бирүләр әллә ничек кенә килеп чыга ул...

Ә менә Салаватка Башкортстанның халык артисты булу бик килешә. Аның Татарстанның халык, Россиянең атказанган исемнәре янында Башкортстанның атказанган артисты дигәне дә бар иде, әмма ул моны бик әйтеп йөрми иде, чөнки бу аның өчен чыннан да азрак иде. 

Ул Башкортстанда туган, шунда укыган, эшләгән. Ул дистә еллар инде ике халыкны да үзенең җырлары белән тәрбияли. Башкортстанда миллионнан артык татар бар дип әйтәбез икән, ул бит аларның да җырчысы. Шул ук вакытта аны башкортлар да яратып тыңлый. Боларны саный китсәң, Салават – бу исемгә иң лаек кешеләрнең берсе. 

Аңа бу исем бик вакытлы бирелде. Башкортстанның 100 еллыгын билгеләгән көннәргә, шулай ук Мәдәният хезмәткәрләре көненә туры килүе дә символик мәгънәгә ия. 

Бүгенге эстрада, җыр сәнгате татар белән башкорт арасында иң бүленми торган өлкә. Салаватны башкорт коллегалары да бик хөрмәт итә. Салават һәрвакыт алар белән элемтәдә булып, аралашып яшәде. Башкорт җырчысы Вильдан Яруллин белән бергә Башкортстанның халык артисты булулары бүгенге көннең бик шатлыклы хәбәре булды.