Бүген 17 июльдә Сабага дөньяның төрле почмакларында яшәүче 150гә якын хатын-кыз җыелды. Өч көн дәвамында биредә "Ак калфак" татар хатын-кызлары иҗтимагый оешмасының күчмә утырышы узачак.
Бу күчмә утырыш "Төп нигез" дигән исем астында үтә. Утырышка килгән туташ һәм ханымнар Сабаның төрле авылларында йөреп, төп нигезне сүндерми яшәтүче гаиләләр белән таныша алачак. Шулай ук татар халкының гореф-гадәтләре күрсәтеләчәк, "Ак калфак"лар өчен махсус Сабан туе оештырылачак.
Ни өчен әлеге күчмә утырыш нәкъ менә Саба районында үтә икән? Сабага кайтканда бу сорау күпләрне борчыды. "Без кая гына барсак та районыбыз турында горурланып сөйлибез. "Эх, Сабаны күрергә иде", - дигән теләкләр ишетелә башлады. Кайткач, аларны район җитәкчелегенә җиткердек. Безнең идеяне алар да хуплады - күчмә утырышны Сабада оештырырга ярдәм иттеләр", - дип сөйләде җирле "Ак калфак" оешмасы җитәкчесе Гөлсем Батырханова.
Район мәдәният идарәсе җитәкчесе Рөстәм Заһидуллин бу көннәрдә шулай ук "Ак калфак"лар белән мәш килеп йөри. Хәер, бу аның өчен яңалык түгел инде. Җирле "Ак калфак" белән иңне-иңгә куеп эшлиләр бит. "Без "Ак калфак"лар белән гел бергә. Нинди генә чара оештырсак та, иң беренче аларга мөрәҗәгать итәбез", - дип белдерде Рөстәм әфәнде.
Саба районы тарихы белән танышканнан соң, кунаклар Шәмәрдән бистәсенә юл тотачак. Ә кич белән "ак калфаклы" Сабан туе узачак.
Фәнзилә МОСТАФИНА,
Комментарий юк