"Һәр өйдә Сабан туе рухы булырга тиеш, дидек"

Mardesign татар дизайны студиясе бишенче татар календарен тәкъдим итте. 2018 ел календаре Сабантуй темасына багышланган.

 

Тәкъдим итү чарасына календарьны төзүчеләр - Ләйсән һәм Айдар Мәрдәншәннар да килгән иде. "Биш ел рәттән тыныч кына чыгарып яттык та быелгысын, ниһаять, зурлап тәкъдим итәргә булдык", - дип башлады сүзен Айдар. "2014нче елгы беренче календарь үзебез белгән татар рәссамнары һәм дизайнерларының эшләрен туплап эшләнде. Ул календарь берәү генә калды инде. Икенчесе шулай ук "солянка" булды, Сабантуй темасы күзәтелә башлады. Менә 2016 елдан башлап, аерым тема билгели башладык. Ул календаребыз "Тәрәзәләр" дигән теманы яктыртты. Татар авылларына барып, махсус рәвештә матур тәрәзәләрне төшереп йөрдек. 2017 елгы календарь исә "Татар кухнясы" темасына багышланды", - дип сөйләде Айдар Мәрдәншин.

 

2018 елгы яңа календарь исә Сабан туе темасын чагылдыра. "Һәр өйдә Сабан туе рухы булырга тиеш, дип уйладык", - дип аңлатты Мәрдәншиннар ни өчен нәкъ менә шушы теманы сайлауларын.

 

Татар календаре татар бизәкләре белән генә чикләнми. Авторлар ай атамаларын да татарчага тәрҗемә иткән. Алар без белгәнчә түгел - иске татар телендә. Мәсәлән, гыйнвар - актан, март - яңарыш, август - ындыр, сентябрь - билек, октябрь - каракөз, декабрь - кырлач.

 

Календарьларны чыгаруда Бөтендөнья татар яшьләре форумының да ярдәме зур булды, ди Мәрдәншиннар. Форумның рәисе Тәбрис Яруллин исә татар дизайнерлары белән ничек танышуларын искә төшерде. "Айдар белән Ләйсән - татар дизайны төшенчәсен безнең тормышка керткән кешеләр. Алар безнең бүлмәгә берничә ел элек танышырга дип килеп керделәр, үзләре ясаган открыткаларны, дискларны күрсәттеләр. Миңа бу бик кызык тоелды. Һәм инде шул ук елны яшьләр форумы өчен Mardesignнан 500ләп открытка һәм диск сатып алдык. Безне ул открыткалар түгел, дөньяга караш берләштерде. Көндәлек тормышта безне әйләндереп алган әйберләрне татарчалаштырырга кирәк. Mardesign менә шуның белән шөгыльләнә дә инде", - дип сөйләде Тәбрис Яруллин.

 

Mardesign календарьлар гына түгел, шулай ук кедалар, свитшотлар, телефон чехоллары да чыгара.