"Мондый очрашулар сезгә дә, безгә дә кирәк"

"Өч көн, бер караганда, бик аз кебек. Тик каядыр барып, нәрсәдер өйрәнү өчен бу бик күп вакыт", - дип белдерде үтте "Ак калфак" татар хатын-кызлары иҗтимагый оешмасы җитәкчесе Кадрия Идрисова, өч көн дәвамында Саба җирлегендә үткән күчмә утырышны йомгаклап.

Биш чит илдән һәм Россиянең төрле төбәкләреннән җыелган татар хатын-кызлары өч көн дәвамында сабалыларның кайда укыганын да, кайда эшләгәнен дә, кайда ял иткәнен дә күрде. Шунысын да әйтергә кирәк: бу күчмә утырыш "Төп нигез", "Васыятьнамә" дигән темаларга багышланган иде. "Мондый очрашулар сезгә дә, безгә дә бик кирәк. Гаиләне күбебез ир белән хатын дип кенә күз алдына китерә. "Ак калфак"лар ярдәме белән моның алай гына түгеллеген аңладык. Гаилә әле ул - балалар да, әткәй-әнкәй, каенана белән каената, оныклар да, туганнар да. Сез исә безнең районда алган уңай тәҗрибәне үз төбәкләрегездә дә куллансагыз, без бик шат булырбыз", - дип билгеләп үтте район башкарма комитеты җитәкчесе Равил Гасыймов.

Саба районы башкарма комитеты җитәкчесенең социаль мәсьәләләр буенча беренче урынбасары Таһир Шәрәфиев әйтүенчә, Сабада 11300дән артык гаилә бар. Һәм ул гаиләләрне саклап калу район хакимияте дәрәҗәсендәге эш итеп куелган. Аерылышуга барып җиткәнче, һәр гаилә белән күрешеп сөйләшәләр икән.

Күчмә утырышта катнашучыларга исә Сабаның үрнәк гаиләләрен күрсәттеләр. "Төп нигез дигәнне бөтен җирлектә дә күрсәтеп булмый. Саба кебек җирләрдә генә күрсәтеп була", - дип йомгак ясады Кадрия Идрисова күчмә утырышның пленар өлешенә.