«Почмак» түр вәгъдә итә

«ШӘҺӘР ЯШИ» дигән замана сәнгатенә ярдәм итү фонды Казанда кыю иҗатчылар өчен иҗади мәйдан булдырды. Тукай урамы белән Париж Коммунасы урамнары почмагында урнашкан, әмма адресы буенча Татарстан урамы, 20 нче йорт саналган йортның аулак кына бер почмагында ут өертеп эшләячәк бу театр хакында һәммәсен беренче чыганаклардан ишетү өчен җыелган газета һәм телевидение җурналистларына креатив театрны оештыручыларның берсе Диана Сәфәрова сөйләде.

Диана Сәфәрова исеме креатив яшьләргә шактый яхшы таныш. ГИТИС тәмамлаган бу кыз Чаллының «Мастеровые» театрында «Маугли» спектаклен куеп караган иде инде. Беренче коймагы төерсез килеп чыккан Диана Сәфәрова, хәзер инде «Зөя утрау-шәһәре» музее директоры Артем Силкин һәм «Шәһәр яши» фонды директоры Инна Яркова белән берлектә төрле экспериментлар өчен театраль мәйданны даими эшләтергә кирәк дигән фикергә килгәннәр.

«Почмак» – әйбәт исем бу экспериментлар театры өчен. Чөнки һәр яңалык, җәмгыять фикере белән йөз процентка тәңгәл килми торган яңалык, һичшиксез «почмаклы», төртелә торган була. Ихтимал, исем сайлаганда бинаның урнашкан урыны гына күздә тотылгандыр. Сынау мәйданчыгы булачак театрның һәр гамәле киләчәктә дә кинаяле мәгънәне эзләргә мәҗбүр итәчәк. Аңлашылса кирәк, театр алдан төзеп куелган репертуар нигезендә эшләмәячәк. Торгынлыктан туйган яшь талантлар кичтән: «Иртәгә нинди мөгез чыгарырга иеән?» – дип йокларга ятачаклар. «Почмак» кыю ниятләрен тормышка ашыру өчен «сәхнәле мәйдан» таба алмый йөдәп йөрүче яшьләр өчен хәзинә булачак.