«Җомга көнне өйләнешәләр, сишәмбе аерылышырга киләләр...»

– Без бүген балаларга карьера ясарга комачаулаучылар итеп кенә карыйбыз, –диде Татарстанның баш казые Җәлил хәзрәт ФАЗЛЫЕВ. – Хатын-кыз ике бала тапса герой кебек йөри... Һәр гаиләгә өч бала алып кайтырга кирәк. Кызганыч, кызларыбызны гаилә өчен үстермибез. Телне саклап калу турында уйламыйбыз. Балаларны җәйге ялга авылга кайтарып кына туган телгә өйрәтеп булмый. Бүгенге әбиләр хәзер русча яхшы сөйләшәләр

– Гаилә – милли дәүләтнең нигезе, – диде үз чыгышында язучы, сәясәтче Фәүзия БӘЙРӘМОВА. – Инде биш гасырга якын татарның үз дәүләте булмаса да, аның теле, дине, гореф-гадәтләре гаиләдә сакланып калган. Тик без бүген кимибез. Ачлык, сугыш елларында да кимемәгән татар нигә бүген кими? Беренчедән, ул табигый рәвештә кими. Икенчедән аны катнаш никахлар йота. (Читтәге татарлар арасында катнаш никахлар бүген 80-90 процентка кадәр җитә). Оешкан татар гаиләләре дә төрле сәбәпләр белән таркала. Мәсәлән, узган ел Әгерҗе районында 111 гаилә барлыкка килгән һәм 110 гаилә таркалган. Көнбатышка ияреп, ялгыз яшәүчеләр арта – аларга шулай рәхәт. Буйдаклар бик күп – өйләнмибез, фәкыйрьлектән куркабыз диләр. Яшәп киткән гаиләләрдә дә балалар 1-2 дән артмый – без үзебезне үз кулларыбыз белән юкка чыгарабыз.

Татар гаиләсе нинди булырга тиеш, бүгенге яшьләргә гаиләләрен саклап калырга ничек ярдәм итәргә? Чыгыш ясаучыларрның күбесе шушы мәсьәләләргә тукталды.