Мисырдан кайткан барлык туристлар да үз багажларын алганчы эшләячәкбез - Васыйл Шәйхразиев

Бүген сәгать иртәнге 5тә "Казан" халыкара аэропортында Мисырга очышларны туктату белән бәйле мәсьәләләрне җайга салу буенча республика штабы киңәшмәсе булды.

Штабның җитәкчесе, ТР вице-премьеры Васыйл Шәйхразиев Хургададан кайткан туристларны каршы алды, аэропортның эш шартларын тикшерде, төрле хезмәтләрнең докладларын тыңлады, дип хәбәр итә Республика матбугат һәм массакүләм коммуникацияләр агентлыгы.

Әйтергә кирәк, туристлар, очышларны туктату һәм шуңа бәйле рәвештә, багажлар тоткарлану вазгыятенә аңлау белән карый.

10 ноябрь иртәсенә Мисырдан Татарстанга 8 рейс кайткан, пассажирларның гомуми саны 1785 кеше тәшкил иткән, аларның 445е - балалар. 7 рейс "Казан" аэропортына һәм 1 рейс Түбән Каманың "Бигеш" аэропортына килгән. Барлык рейслар да аэропортларга багажсыз кайта, дип хәбәр итте Россия Гадәттән тыш хәлләр министрлыгының ТР буенча Баш идарәсе оператив төркеме башлыгы, эчке хезмәт полковнигы Рафаил Мотыйгуллин.

Туристлык буенча ТР дәүләт комитеты мәгълүматлары буенча, Мисырда Татарстан Республикасы аэропорты аша очкан тагын 2200ләп турист кала. Барлык туристларны алып кайтып бетерү өчен тагын 13 авиарейс кирәк. Ахыргы рейсны 18 ноябрьдә кабул итү күздә тотыла.

"18 ноябрьдән соң, Мисырдан барлык туристлар кайтып беткәч тә, тынычланмаячакбыз. Бу дата безнең эшнең беренче, иң мөһим этабы тәмамлануны аңлатачак. Пассажирларга багажларын бирү белән бәйле икенче этап тәмамлангач, штаб үз эшен тәмамлады дип санап булачак. Оператив штаб соңгы чемодан хуҗасына тапшырылганчы эшләячәк", - дип билгеләп үтте Васыйл Шәйхразиев.

9 ноябрьдә "Казан" аэропорты Мисырдан Мәскәүгә даими авиарейсларда кайткан багажларны кабул итә башлады. 10 ноябрь иртәсенә 17 багаж кабул ителгән, аларның 5се тапшырылган, 12се саклануда кала.

Багажлар, Мәскәүдән пассажирлар кайтканнан соң, 2-3 көн тоткарлык белән китерелер дип планлаштырыла. Кайткан пассажирның багажы Татарстан Республикасына китерелүгә тиешле хезмәтләр заявкада күрсәтелгән телефон номерлары буенча аның хуҗасы белән элемтәгә керәчәк. Туристлар кайтып күбрәк вакыт узган булса, багаж турында (843) 254-00-80 номеры буенча белергә була.

"Бүген без пассажирларны каршы алуның оештырылганына инандык. Туристлар исән-имин кайтып җитә һәм уңайсызлыкларын киметү өчен барлык шартлар да булдырыла. Пассажирлар туган вазгыятькә аңлау белән карый һәм бөтен кирәкле әйберләрне үзләре белән алуы турында әйтә. Хәзер логистиканы һәм багажларны җиткерү механизмын җайга салырга кирәк. Икенче очрашу вакытында әлеге мәсьәлә турында фикер алышырга тәкъдим итәм", - дип сүзен йомгаклады Васыйл Шәйхразиев.

сылтама: http://tat.tatar-inform.ru/news/2015/11/10/115350/

Следите за самым важным и интересным в Telegram-каналеТатмедиа