​Хыялыгызны тормышка ашырырга телисезме?

Бүгеннән, ягъни 14 августтан башлап, Татарстан Республикасы икътисад министрлыгы, грант алу өчен, социаль әһәмияткә ия булган проектларны гамәлгә ашыручы коммерсиячел булмаган оешмалардан бәйгедә катнашырга гаризалар кабул итә башлый. Бу хакта бүген Татар-информ мәгълүмат агентлыгы уздырган матбугат конференциясендә хәбәр иттеләр.

Бәлки сез йорт яныгызда балалар мәйданчыгы төзергә телисездер? Сугыштан әйләнеп кайтмаган авылдашларыгыз хөрмәтенә салынган һәйкәлне яңартырга вакыт җиткәндер? Яисә авыл эчендәге күл тирәсен  матурларга кирәктер? Ире белән аерылганнан соң, баласы белән ялгыз урамда калган хатын-кызларга ярдәм итү теләгегез бардыр? Әгәр шулай икән – бу бәйге сезнең өчен.  

Быел беренче тапкыр оештырыла торган бу конкурста катнашып, ниятегезне тормышка ашыра башлау мөмкинлеге бар. Татарстан Республикасы Президенты Рөстәм Миңнеханов, гражданлык җәмгыятен үстерү, аларның инициативаларын эшкә җигү махсатыннан, грантлар өчен бюджеттан 35 миллион акча бүлеп биргән. 
Бәйгедә бары тик коммерсиячел булмаган оешмалар гына катнаша ала. Һәм аларның рәсми рәвештә теркәлүенә ким дигәндә 1 ел булырга тиеш. 

Әйткәнемчә, гаризалар Татарстан Республикасы икътисад министрлыгында бүгеннән башлап, 27 сентябрьгә кадәр кабул ителә. (Конкурсның нигезләмәсе, шартлары һәм гаризаны тутыру тәртибе белән министрлык сайтында танышырга мөмкин). Гаризаны почта аша да юлларга ярый, китереп бирергә дә була. 
Һәр гаризаны экспертлар өйрәнеп, баллар куячаклар. Аннан нәтиҗәләр конкурсның комиссиясенә тапшырылачак. Комиссия рәисе – Татарстан Республикасы Премьер-министр урынбасары – Васил Шәйхразиев. 

Исегезгә төшерәбез: моңа кадәр социаль әһәмияткә ия булган проектларны гамәлгә ашыручы коммерсиячел булмаган оешмаларга субсидияләр бирү өчен Татарстан Республикасы бюджетыннан елга 10 миллион акча бүленеп бирелә иде.