Казанда Татарстан мәгариф учреждениеләре авыл хуҗалыгы продукциясе ярминкәләре үткәрә

Ярминкә һөнәри белем бирү сыйфатын күтәрү, яшьләр арасында эшче һөнәрләрен популярлаштыру һәм халыкны авыл хуҗалыгы продукциясе белән тәэмин итү максатыннан оештырыла.

«Без традиция буенча ярминкә үткәрәбез һәм ул икенче тапкыр агросәнәгать паркында уза. Бу уңайлы мәйданчык. Биредә кирәкле инфраструктура бар. Ярминкәдә авыл хуҗалыгы продукциясенең бай ассортименты тәкъдим ителәчәк, шулай ук республика мәгариф учреждениеләрендә җитештерелгән бакча участогы, тегү, текстиль, кулинария эшләнмәләр", - дип сөйләде ТР мәгариф һәм фән министрының беренче урынбасары Андрей Поминов.
Чарада ссузлардан тыш, урта гомуми белем бирү мәктәпләре һәм өстәмә белем бирү үзәкләре дә катнаша. Гомумән алганда, республиканың барлык муниципаль берәмлекләреннән 200 ләп оешма үз продукциясен тәкъдим итәчәк.
Оештыручылар сүзләренә караганда, товарлар базар бәясеннән очсызрак булачак. ТР Авыл хуҗалыгы министрлыгы тавык түшкәсе өчен 110 сум, күркә түшкәсе өчен 200 сум тәкъдим итә, сөтнең литры - 28, беренче категория йомырканың дистәсе 42 сум һ.б. А.Поминов билгеләп узганча, сатып алучыларга уңайлы булсын өчен 50 волонтер җәлеп ителгән, алар товарларны җәмәгать транспорты тукталышына кадәр алып барырга ярдәм итәчәк.
«Бу ярминкә - тәҗрибә туплау өчен зур мөмкинлек. Балалар үзләре товар җитештерә һәм эшмәкәрлек эшчәнлеге нечкәлекләрен үзләштереп, үзләре сата да. Урта һөнәри белем алучы студентлар күп яклап үсеш алган һәм авыл хуҗалыгы җитештерүчеләре белән көндәшлек итә ала», диде Әнфисә Җәләлова.

Ярминкәдән тыш, ТР Мәдәният министрлыгы карамагындагы мәгариф учреждениеләре студентлары бай мәдәни программа тәкъдим итә.

сылтама: http://tat.tatar-inform.ru/news/2015/10/05/114280/