Казанда «РОСТКИ» IV Халыкара форумы уза

Казанда «РОСТКИ» IV Халыкара форумы кысаларында «Россия – Кытай: уртак киләчәкне формалаштыру нигезе буларак бердәм медиакод» дип аталган дискуссия уза. Сессияне «Татмедиа» Республика матбугат һәм массакүләм коммуникацияләр агентлыгы оештырды.

Ирекле дискуссия форматында Россия һәм Кытай медиасын берләштерә алырлык уртак мәгънәви киңлек – бердәм медиакод формалаштыру мәсьәләләре каралды. Катнашучылар билгеләп үткәнчә, ул киләчәктә уртак медиапроектларны үстерүгә һәм ике ил аудиториясе арасында үзара ышанычны ныгытуга нигез була ала. Сессиядә Россия һәм Кытай журналистикасын берләштерә торган төп кыйммәтләр һәм мәгънәләр, мәдәни, тел һәм алгоритмик киртәләрне җиңеп, мәгълүмат алмашуны үстерү юллары турында фикер алыштылар. Шулай ук ике ил аудиториясе арасында үзара ышанычны ныгытуга ярдәм итә торган уртак медиапроектлар форматлары һәм төбәк медиасының уртак мәгънәви киңлек формалаштырудагы роле турында сөйләштеләр.

Катнашучылар яңа медиа форматларын цифрлы мохиткә һәм яшь аудиториягә яраклаштыру мәсьәләсенә дә игътибар бирде. Бу юнәлештәге эшнең Россия-Кытай медиахезмәттәшлеген озак вакытка үстерү өчен мөһим булуы ассызыкланды. Сессияне «Көнчыгышны өйрәнү мәктәбе» җитәкчесе, Милли тикшеренү университеты – «Югары икътисад мәктәбе»нең Дөнья икътисады һәм дөнья сәясәте факультеты доценты Алексей Ефимов алып барды.

Фикер алышуда «Татмедиа» җитәкчесе Айдар Сәлимгәрәев, Кытайның Чжэцзян халыкара коммуникацияләр үзәге журналисты Чэнь Имэн, «Shanghai Morning Post» газетасының баш мөхәррире Ян Вэйчжун, «Интерфакс» АҖ генераль директоры урынбасары Николай Касьянов, «Россия сегодня» халыкара медиатөркеменең генераль директоры урынбасары Дмитрий Горностаев, Кытай икътисади массакүләм мәгълүмат чаралары федерациясенең генераль секретаре Цзян Шанъюань һәм башка экспертлар катнашты.