Тарихның җанланганын күрергә теләсәгез, бу ялларда Болгар шәһәрчегенә килегез. 10-11 августта анда Халыкара «Бөек Болгар» урта гасыр яулары фестивале уза.
Чын гаскәр түгел, билгеле. 10-11 августта анда Халыкара «Бөек Болгар» урта гасыр сугышлары фестивале уза. Быел аның алтынчысы. Елдан-ел фестивальнең кунаклары ишәя генә. Катнашучылар саны да арта. Быел, мәсәлән, Россиянең төрле шәһәрләреннән тыш Казакъстан, Украина, Эстония, Латвия, Кыргызстаннан да спортсменнар киләчәк. Фестиваль кысаларында булса да, сугышлар чын сугыш төсмерен алачак, монда һәркем җиңәргә һәм бүләк отарга дип килә.
Кунакларны нинди кызыклар көтәме? Беренчедән, 7 төрле мәйданчык көтә. Алар арасында олылар өчен дә, балалар өчен дә кызыклар җитәрлек. Мастер-класслар да, концерт номерлары да, уеннар, төрле тамашалар һәм, әлбәттә, урта гасырларның чын яугирләре булып киенгән спортчыларның үзара ярышлары да булачак. Мәйданчыкның берсе «Алтын Урда» дип атала. Монда Алтын Урда тарихы, ханнар тормышы, шул чорга хас һөнәрләр белән танышырга мөмкин. «Урта гасыр балалар дөньясы» дигәнендә сабыйларга рәхәтләнеп тәгәрәп уйнарлык.
Бу фестивальдә тарихның кабат җанланганын күзәтеп кенә утырырга түгел, ә ул процесста үзеңә дә катнашырга мөмкин. Кем буласыгыз килә: кыю яугир яки зирәк хакимме? Әллә булат кылычлар ясаучы чын оста булырга кызыгасызмы? Бу хыялларның барысын да тормышка ашырырга була әлеге фестивальдә.
Керү – түләүле. Олылар өчен билет бәясе – 400 сум. Үз чатырлары белән куна килүчеләр өчен махсус зона булдырылган, анда бәдрәфе, душы, электр энергиясен куллану мөмкинлеге бар.
Әйткәнебезчә, фестиваль 10 августта иртәнге сәгать 10 да башлана.
Следите за самым важным и интересным в Telegram-каналеТатмедиа
Комментарий юк