Безне татар булуыбыз берләштерә!

Бөтендөнья татар конгрессының VIсъезды пленар утырышында Татарстан Республикасы Президенты Рөстәм Миңнеханов чыгыш ясады. Ул аны: «Бисмиллахирахманрахим», – дип башлады.

- Бүгенге съездның конгресс оешуга 25 ел тулу белән туры килүе сиволик мәгънәгә ия, – диде ул. – Конгресс халкыбызны берләштерүдә мөһим факторга әйләнде. Ул шактый уңышлы проектлар күтәреп чыкты. Аның башлангачысында төрле чаралар уза. 
Казакъстанда, Үзбәкстанда, Кыргызстанда, Төркиядә, Кытайда, Финляндиядә, Ульяновск өлкәсендә, Чуашстан, Башкортстан республикаларында төбәк оешмалары зур хезмәт куя.
Президент милли хәрәкәттә актив катнашкан байтак милләттәшләребезнең исемен атады: Гөлсинә Үлмәскулова (Кыргызстан), Атик Али (Финляндия), Фәрит Гыйбатдинов (Чуашстан), Лена Колесникова (Чиләбе), Рамис Сафин (Ульяновск), Камил Әбләзов (Сарытау)... 

- Татарлар кайда гына яшәсәләр дә, тарихи Ватаннары итеп Татарстанны сайлыйлар, – диде ул. – Безне татар булуыбыз берләштерә. Татар халкының киләчәге безнең кулда. Халкыбызның киләчәктәге урыны бары тик бездән тора!