БДИ татар телендә тапшырылырга тиеш!

Казан шәһәренең Ш. Мәрҗани исемендәге 2 нче татар гимназиясе директоры Камәрия ханым ХӘМИДУЛЛИНА Бөтендөнья татар конгрессының VI съездында ясаган чыгышында бик күпләрнең әйтәсе килгән фикерен җиткерде кебек:

- Милли мәгарифтән курку бар. Башлангыч белемне булса да, татар телендә бирергә кирәк. Татарча гаиләдә сөйләшергә кирәк, диләр.(Әмма әти-әниләр үзләре дә татарча сөйләшә белмиләр!) Телебезне мондый чикләүләр эченә кертү дөрес түгелдер. Ана баласына бер бишек җыры гына көйли алырлык итеп өйрәнү. Аны башлангыч мәктәптә генә уку. Үзебез утырган агачка балта чабу бу!

Милләтне саклау – телне саклау ул. Ә телне саклау шул телдә язылган дәреслекләрдән укыту ул. Бүген исә татарча дәреслекләр чыгару бетте. Милли кадрлар әзерләү юкка чыкты. Милли матбугатка иҗтыяҗ кимеп бар.

11 буе балаларга белемне татар телендә бирәбез дә, чыгарылыш имтиханнарын рус телендә тапшырырга мәҗбүр итәбез. Хөрмәтле Президентыбыз! Сезгә укытучылар, ата-аналар исеменнән мөрәҗәгать итәбез, – диде ул. – 362 нче боерыкны юкка чыгару буенча федераль үзәк белән аңлашу табарга кирәк. Без Сезгә таянырга телибез!

Чыгышының ахырында Камәрия ханым бик гыйбрәтле бер тарих сөйләде.

Рәсүл Гамзатовның бер танышының улы сугыш вакытында югала. Аның анасы бу хәсрәттән башына кара шәл ябына.

Чит илгә чыккач, Рәсүл ага ананың улын таба. Кайткач, анага әйтә:

- Кара шәлеңне сал инде, улыңны таптым! – ди.

Ана кара шәлен сала һәм шунда ук сорау бирә:

- Телен онытмаганмы?

- Оныткан. Без аның белән тәрҗемәче аша аңлаштык, – ди әдип.

Ана кара шәлен кабат ябына. Бу юлы инде гомерлеккә.