​ Алсу алма бәлеше

Бәлешне төчегә генә әзерлибез. Камырны нәкъ бәрәңге тәкәсенә баскан кебек басабыз. Әзер камырны ике өлешкә бүләбез: төбенә дигәне зуррак, капкачына дигәне кечерәк булсын. Зуррак кисәкне уклау белән тәгәрәтеп җәеп, майлаган табага салабыз. Камыр таба читенә чыгып калсын.

Алмаларны юып, юка гына телемләп турыйбыз. 

Сливаны төшләреннән арындырып, блендер белән издерәбез (слива өлгергән вакытта күп итеп ясап, туңдыргычта сакларга була). Слива урынына теләсә нинди башка җиләк-җимеш  куллансаң да ярый.
Туралган алма белән сливаны бергә кушып, шикәр комы салабыз, барысын бергә болгатабыз да, камыр өстенә тигезләп салабыз. Шикәр комы алманың тәменә бәйле, алма ачырак булса, күбрәк кирәк.
Камырның кечерәген шулай ук юкартып җәеп, алма өстенә каплыйбыз. Кырыйларын ябыштырып чыгабыз, аннары матурлап бөрәбез. 

Алма бәлеше 200 градус кызулыктагы мичтә 35-40 минут пешә.