Түбәтәйле сыер картасы

Кирәк:

(бер өлеш өчен)

* 130 г пешкән сыер картасы;

* уртача зурлыктагы бер баш суган;

* бер порей суганы;

* 10 г сөт өсте;

* 5 г катлы камыр;

* тәменчә тоз, борыч, бизәү өчен рәйхан үләне.

Эш барышы:

Картаны саламлап, суганны боҗралап, помидорны телемләп турыйбыз. (Помидорны иң элек кайнар су белән пешекләп, кабыгын салдырырга кирәк.)

Кызган табада әүвәл башлы суганны, аннан соң порей суганын, соңыннан помидорны майда кыздырабыз.

Яшелчәләр әзер булгач, алар янына телемләп туралган картаны салабыз. 1-2 минуттан сөт өстен өстибез, тәменчә тоз сибәбез.

Камырны түгәрәкләп җәеп, бокал яисә касә төбенә каплыйбыз һәм шул хәлендә кызу мичтә пешерәбез. Бу без әзерли торган кыздырманың капкачы булачак. Капкачыбыз кокотница белән бер диаметрда булырга тиеш. (Аны сатып алган әзер камырдан да ясап була).

Кыздырган картаны суганнары, помидорлары белән бергә кокотницаларга бүлеп чыгабыз. Камырдан пешергән капкачын каплыйбыз да биш минутка кызу мичкә тыгып алабыз.

Әзер ризыкны рәйхан, петрушка яисә башка яшел тәмләткечләр белән бизәп, кокотницасында килеш табынга чыгарабыз.