Әлеге алкалар французларның сутаж ысулы белән ясала. Ул гади, әмма нәтиҗәсе искиткеч. Алка гына түгел, шул рәвешле брошка, каеш аелы, билбау да үрергә мөмкин.
Кирәк:
* 1 алка өчен төрле төстәге 30-40 см сутаж җеп. Энә-җеп кибетләрендә сатыла ул.) Без алты төсле җеп кулландык.
* җеп төсенә туры килә торган сәйләннәр, нечкә энә;
* универсаль җилем;
* күн кисәге;
* алка элмәге (анысын да шул кибеттән табарга мөмкин).
Эш барышы:
Җепләрнең барысын да урта җирдән тигезләп тотып, Таралып китмәсен өчен бер-берсенә энә-җеп белән чәнчибез һәм элмәк сыман итеп аска таба бөгәбез. Элмәкнең уртасына сәйлән урнаштырабыз. Һәр «адымны» энә-җеп белән чәнчеп барабыз.
Җепләребезнең бер «койрыгын» – бер якка, икенчесен икенче якка бөгеп, элмәкләр ясыйбыз. Аларының да урталарына сәйлән куябыз. Хәзер ике яктагы ике элмәк тирәли вак сәйләннәр тезеп чыгарга кирәк. Ул сәйләннәр тирәли сутаж җепне уздырабыз. Без, мәсәлән, алканың беренче өлешен ясаганда (фотоларда) кулланган алты җепнең өчесен бу урынга җиткәч кисеп алдык та эшне калган икесе белән генә дәвам иттек.
Иң ахырдан шушы ике җептән элмәк ясап, аларның уртасына берәр сәйлән беркеттек. Киселгән җеп очларын арткы яктан алкага ябыштырып куйдык. Алканың беренче өлеше әзер.
Икенче өлеш тә шул ысул белән эшләнә. Эшне беренче өлештәге кебек үк башлыйбыз. Уртага сәйлән кыстырып, җепләрне бу юлы өскә таба элмәкләп бөгәбез. Элмәк кырыена ике яклап шул ук зурлыктагы сәйләннәрне тезәбез. Төсле җепләрнең алтысын да алар тирәли уздырабыз. Сәйләннәрне ураткач, җепне янә элмәк итеп бөгәбез, элмәк уртасына вак сәйлән урнаштырабыз.
Элмәк тирәли сәйләннәр тезәбез дә аларны ике төсле генә җеп белән әйләндереп алабыз. Иң ахырдан ике элмәк арасына озынча бер сәйлән беркетәбез.
Алканың ике өлешен сәйлән ярдәмендә бергә тоташтырабыз. Җеп очларын яшерү өчен арткы якка күн кисәге ябыштырып, алка элмәге беркетәбез. Алка әзер! Брошка да шулай ук ясала. Җепне үзегез теләгәнчә бөгә аласыз. Нинди рәвешләргә кертсәгез дә, матур килеп чыгачак.
Гүзәл Гыймадиева,
Комментарий юк