Гөлфия белән Шамил Бариевлар мәхәббәте – шушы матур риваятьләрнең берсе. Моннан ике дистә еллар элек – башта Г.Камал театрының талантлы артисты Шамил Бариев, аннан соң озак та вакыт үтмәстән хатыны Гөлфия Бариева вафат булгач, халык тудырган мәхәббәт турында риваять.
Гүзәл мәхәббәтнең кадерле җимеше – Айгөл Бариева – шушы көннәрдә матур легенданы яңарта торган матур гамәл кылды: Шамил Бариевның сөйгәне Гөлфиягә язган хатларын китап итеп бастырып чыгарды. Тыйнак кына, җыйнак кына китап.
Айгөл бу хатлар турында бөтенләй белмәгән, алар Гөлфия ханым кадерләп җыеп куйган урында үз вакытларны көтеп ятканнар. Айгөл аларга фатирдан күченгәндә генә тап булган.
Ниһаять, хатлар Нәбирә Гыйматдинованың сүз башы белән, “Тапшырылган хатлар” дигән романтик исем белән дөнья күргәннәр. “Бер хатны да төшереп калдырмадым, бер сүзен дә үзгәртмәдем, барысы да ничек бар – шулай чыкты”, - ди Айгөл.
Җомга көн Казан рестораннарының берсендә “Тапшырылган хатлар” китабын тәкъдим итү кичәсе булды.
Гаҗәп, китапны тәкъдим итү кичәсен Айгөл истәлекләргә уралган традицион форматтагы мәдәни чара итеп ясамаган. Югыйсә, әтисе эшләгән театрның уңайлы кече сәхнәсендә юксыну кичәсе ясап булыр иде. Шул хатлар нигезендә хәзер популярлашып килә торган әдәби театр күрсәтеп булыр иде.
Әмма Айгөл Бариева - эстрада җырчысы. Кешеләргә бәйрәм ясау – аның һөнәре. Ул шушы һөнәренә тугры калып, әтисен юксынып килүчеләр өчен “күңелле ял итегез” кичәсе ясаган.
- Минем бу кичәне нәкъ шушы форматта үткәрәсем килде. Әти белән әни бик кунакчыл кешеләр иде. Өебездән кеше өзелмәде, шуның өчен әти-әни исән чактагы кебек бәйрәм ясыйсым килде. Биредә, күрәсезме, нигездә, өлкән буын килгән. Рәхәтләнеп ял итсеннәр, - диде Айгөл.
Ресторанның кечкенә генә сәхнәсенә татар сәнгатенең бөтен жанрлары сыешкан иде. Г.Камал театры артисты Ришат Әхмәдуллин бер үзе әдәби театр куя: Шамил Бариевның Ленинградтан сөйгәненә Казанга язган хатларын укый. Алып баручы – популяр музыка вәкиле Зөлфәт Зиннуров һәрвакыттагыча “үз репертуарында” – эстрада сәхнәсе стилендә шаярта. Айгөлнең сәхнәдәш дуслары – татар эстрадасының урта буын вәкилләре – Лилия Муллагалиева, Рөстәм Закиров, Илсафлар җырлый. Һәм истәлекләр, истәлекләр, истәлекләр... Туганнар, дуслар, хезмәттәшләр...
Әзһәр Шакировның фәлсәфи чыгышы аеруча тәэсир итте:
- Кешенең гомере кыскамы ул, озынмы – адәм баласы эз калдырырга тиеш. Шамил Академия театры сәхнәсендә якты эз калдырга артист. Артист үз вакытында үлә белсә зур бәхет ул. Вакытында үлә белгән артистны тамашачы яшь итеп, матур итеп, талантлы итеп хәтерендә калдыра, - диде олпат артист. – Картаеп сәхнәгә чыкса, ул аның яшьлеген сагына һәм нигә инде бу яшендә сәхнәдә йөри, ди.
Төп тексттан читләшкән бер фикер: ялгыша Әзһәр абый, хәер, ялгышмыйдыр, ә бары тик яшьлеген сагынуыннан туган уйлардыр, бәлки. Кайбер артистларның яше барган саен, затлы шәраб кебек, бәһасе арта гына бара. Үзе шундыйлардан. Мең яшә, Әзһәр абый!
- Телисеңме-теләмисеңме, бүген юксыну кичәсе, - дип дәвам итә Әзһәр Шакиров. - Әллә ниләр әйтеп көлдерсәң дә... шундый кешеләр була – аларны юксынмыйча искә алып булмый. Үзе күрсә иде ул үзен ничек хөрмәт иткәннәрен, кызының бу яхшылыкларын. Академия театры исеменнән рәхмәт, үскәнем!
- Өч елдан әтинең тууына 70 яшь була. Бүгеннән әзерләнә башладым. Зур сәхнәләрдә искә алу кичәләре үткәрербез әле, - диде Айгөл.
чыганак: http://intertat.ru/tt
