Елның иң булган хатын-кызларын Балтачта барлыйбыз

Үзәккә үткән ачы җилләре, кар-бураннары белән тагын февраль килде. Яз бәйрәменә дә күп калмады. Ә ул бәйрәм без, хатын-кызлар өчен «Ел хатын-кызы. Ел ир-аты: хатын-кыз карашы» республика бәйгесеннән башланып китә. Ул быел 22 нче тапкыр уздырыла, ягъни узган гасырда башланып, XXI гасырда да дәвам итә. Ел саен көтеп алабыз, ел саен иң уңган, иң булдыклы, иң алдынгы хатын-кызларны барлыйбыз, алар кебек булырга тырышабыз. Ә андый уңганнарыбыз күп, бик күп безнең. Шунысын да искәртик, республика бәйгесе иң элек зоналарда үтә.

Менә хәзер дә Балтач районы Мәдәният йортына дистәләгән районның иң шәп хатын-кызлары җыелган. Биектау, Арча, Әтнә, Кукмара, Лаеш, Питрәч, Саба, Теләче, Балык Бистәсе, Балтачныкылар. Бәйгене оештыручылар: «Татарстан хатын-кызлары» иҗтимагый оешмасы, Татарстан Республикасы Хезмәт, эш белән тәэмин итү һәм социаль яклау министрлыгы, Татарстан Республикасында Кеше хокукларын яклау буенча вәкаләтле вәкиллек аппараты, Татарстан Республикасы профсоюзлары. 9 номинациядә чыгыш ясаган конкурсантларны Гүзәлия Тәлгать кызы Минкина җитәкчелегендәге бик абруйлы, дәрәҗәле жюри бәяли. Гаҗәеп язмышлы әниләр, уңган киленнәр, алдынгы укытучылар, олы йөрәкле табиблар, тәвәккәл эшмәкәрләр үз осталыкларын күрсәтә. Кемнәр җиңәр, кемнәр республика бәйгесенең йомгаклау турына узар – алар хакында соңрак язарбыз. Ә хәзергә Балтач гөрли!