Җете төсләр яратканга...

1976 елда Казан сәнгать училищесын тәмамлап, Татарстан китап нәшриятына бизәлеш редакторы булып эшкә урнаша. 1992 елда «Мәгариф» нәшриятында китап бизәлеше редакциясе мөдире вазифасына алынганнан соң, иҗатын тулысы белән дәреслекләргә һәм, мөгаен, җете төсләр яраткангадыр, балалар әдәбиятына багышлый. «Дәреслекләр бизәү – гаять четерекле эш, аның кагыйдә-кануннары рәссамның фантазиясен чикли түгелме?» – дигән соравыбызга утыз биш еллык хезмәт тәҗрибәсе булган оста, тыйнак кына: «Иң авыры – вакыт кысанлыгы, дәреслек уку елына чыгып өлгерсен өчен, аеруча җәйге айларда тыгыз эшләргә туры килә», – дип җавап бирде. «Мәгариф» нәшрияты китапханәсе», «Милли әдәбият китапханәсе», «Татар әдәбияты дөньясы», «Нәниләр китапханәсе», «Балалар күңеле» сериясендәге китаплар нәкъ менә Лилия Золондинова бизәлешендә дөнья күргән. Рәссам кулы белән бизәлгән зәвыклы басмалар Бөтенроссия китап конкурсларында дипломнар белән бүләкләнгән. Рәссамның хыялы – киләчәктә ирекле иҗат белән шөгыльләнү. Әлеге хыял һичшиксез тормышка ашар һәм Лилия ханымның иҗат җимешләре лаеклы рәвештә күргәзмә залларында урын алыр дип ышанасы килә. 

«Сөембикә», № 6, 2010.