Чыршы бәйрәме, Яңа ел маҗаралары белән бергә кышның тагын бер зур вакыйгасы – декабрь аенда төрле музыкаль премияләр тапшыру тантаналары уза башлый. Әмма узып баручы 2020 ел тормышка шактый үзгәрешләр кертте. Купшы кунаклар җыела торган «Татар җыры» тантанасы быел бөтенләй уздырылмый, икенче елга күчерелә дип беләбез. Ә менә «Болгар радиосы» VIII Милли музыкаль премиясен тапшыру тантанасын һәркем күрә алачак. Концертны онлайн форматта турыдан-туры трансляциядә «Татарстан–Яңа гасыр» телеканалында һәм интернет киңлекләрендә карап булачак.
