Юлъязма. Өченче көн

7 июль. Көнебезне поляр түгәрәк артында төгәлләдек. (67 нче киңлектә.) Әмма көн үзе биредә төгәлләнми, чөнки кояш ни чыкмый, ни батмый. Ул җәйге чорда бер чыга, ә кышка - байый. Моны поляр көн дип атыйлар. Кызык: сәгать төнге 11, ә син кояштан саклану өчен күзлек киясең.

Көн бүген иртәрәк, сәгать 7дә үк башланды. Яңгыр яуганчы дип тиз генә палатканы җыйдык та Швециягә таба юл алдык. 
Юлда еш тукталышлар ясап, кечкенә шәһәрләрне карап йөрдек, кибетләргә сугылып чыктык, капкалап алдык, урманга да кагылып чыктык. Урманнар җиләккә бай монда! Юлдан ерак та түгел күпләп черника (караҗиләк) үсә, бераз шуны җыйдым. Искәндәр үзенең яраткан үсемлекләрен фотога төшерде, укучыларыма күрсәтәм дип, үзе белән 2 төр лишайник та алды.
Овертурнеа шәһәрендә Швеция ягына чыктык. Чикне узу минем өчен көтелмәгәнчәрәк булды. Ниндидер контроль постларны узарбыз дип уйлап уйлаган идем. Гади генә күперне кичтек тә чыктык! Баксаң, шенген зонасы илләрендә берсеннән икенчесенә шулай күрше авылга чыккан кебек кенә узып йөриләр икән. Аптырашта калуымны күреп, Искәндәр мине тагын бер кат күпер буйлап Финляндиядән уратып алып килде:) Шулай итепбез бүген Швециягә 2 тапкыр кердек!