Маскаларны кайчан салабыз?

Күпләребезне бу битлек-перчаткаларны кайчан салабыз инде дигән уртак сорау берләштерә. Салмыйбыз икән әле, җәмәгать! Чөнки Казанда битлек-перчатка режимы ел ахырына кадәр сакланачак. Бу турыда Татарстан башкаласы мэриясендә узган киңәшмәдә шәһәр башлыгы Илсур Метшин әйтте. «Мондый режим, ким дигәндә, ел ахырына кадәр барачак», – диде мэр.
Узган тәүлек эчендә Татарстанда табиблар коронавирус йоктыруның 62 яңа очрагын ачыклаган. Диагностика башланганнан бирле Татарстанда барлыгы 2849 Covid-19 очрагы теркәлгән. 1959 кеше сәламәтләнгән, шул исәптән, 52 се – узган тәүлектә.