Ач карынга туп тибеп булмый!

«Татар-информ» мәгълүмат агентлыгында татар рестораторлары катнашында матбугат конференциясе булып узды.  

 Футбол буенча дөнья чемпионатына килгән кунакларны татар рестораторлары нәрсә белән шаккатырырга җыена? Менюларда нинди үзгәрешләр көтелә? «Тәмле булсын» рестораны җитәкчесе, Татар милли мәдәнияте һәм ашлары халыкара ассоциациясе рәисе, Татарстан Республикасының халыкка хезмәт күрсәтү өлкәсенең атказанган хезмәткәре Резеда ХӨСӘЕНОВА һәм «Түбәтәй» тиз туклану челтәре җитәкчесе Солтан САФИН журналистларга шулар хакында сөйләделәр.  

Чемпионат кунакларын кабул итәргә әзерләнү максатыннан, бу татар рестораторлары үзләренең рестораннарында менә нинди эшләр алып барганнар: 

 

«Тәмле булсын»  

– кунакларга җайлы булсын өчен меню өч телдә төзелгән: татарча, русча, инглизчә; 

– официантлар инглиз телендә сөйләшергә өйрәнгән: һәр сменада ким дигәндә бер официант инглиз телендә иркен аралашырга тиеш дигән максат куелган; 

– ассортимент бик зур булачак: өчпочмак, вак бәлеш, гөбәдия... Хәтта зур бәлешне кечкенә табада пешереп, һәр кунакка аерым әзерләячәкләр; 

– чемпионат көннәрендә татар аш-суларын әзерләү буенча аларда махсус мастер-класслар узачак. Аларда 20-25 кеше катнаша алачак. Студия инде әзер, «Тәмле булсын» дип язылган алъяпкычлар, баш киемнәре килүче кунакларны көтә. Мастер-класс инглиз теленә тәрҗемә белән үткәреләчәк.  

– мөселман кунаклар өчен тәһәрәт һәм намаз бүлмәләре әзер. 

 

«Түбәтәй» 

– чемпионат барган көннәрдә «Түбәтәй»дә матч-трансляцияләр оештырылачак; 

– кассаларда сатып алучылар белән инглиз телендә аралаша алган кызлар утырачак; 

– чемпионатның фан-зонасында «Түбәтәй» нокталары эшләячәк; 

– «Түбәтәй» эчендә һәрвакыттагыча татар көйләре яңгырап торачак; 

– меню гарәп, фарсы һәм испан телләренә дә тәрҗемә ителгән; 

– мөселманнар намаз бүлмәсеннән дә файдалана алачак; 

– чемпионат барган көннәрдә сатып алучыларга яңа ингредиентлар белән әзерләнгән өчпочмак тәкъдим итәчәкләр. Ул нәрсәләрдән әзерләнәчәк – әлегә сер.