Шигърият

Сагынам сине һаман...


Чулпан Зариф, 6 май 2015 - 00:00
1033
0
0
Моң-сагыш, мәхәббәт, сагыну шагыйрәсе ул. Шигърияте – кояшлы, әфлисун тәмедәй татлы. Үзе – таң йолдызы. Арчаларда туган. Казан – Шәрык белән Көнбатыш арасындагы озын ерак юлындагы (һәм иҗатта, һәм фәндә, һәм тормышта) серле күпер. Бүгенге адресы – Төркия, Мугла университеты. Татар мифологиясе, гореф-гадәтләре турында төрекчә лекцияләр укый, татар, рус теле дәресләре алып бара. Чулпанның шомырт бураннарын, сиреньле урамнарын, кичке фонарьларын бүген әлсерәгән кояш, диңгез, шәфталулар, зәйтүннәр алыштырган. Ә ярату – һаман элеккечә – кайнар!

Бадәмнәр чәчәктә


Бадәмнәр чәчәктә...
Һавада – бал исе...
Яз белән килгәнсең,
яз булып кал дисең...

Булмас шул...
Куйса да күңелләр җилкенеп,
Мәңгелек түгел без,
йөгәнсез җил кебек.

Җил... Җирнең хәтерен
яшәткән риваять...
Мәҗүси китаптан
өзелгән бер «аять»...

Исәр дә,
тузгытыр чәчәкләр галәмен,
Очыртыр күкләргә
язның ал әләмен...

Илемнең дәүләтле
язларын уздырып,
Чулпылар чыңлатып,
толымнар туздырып,

Сүндереп даланың
мең еллык учагын,
Имәндәй ирләрнең
суытып кочагын.

Иделдән килгәнме?
Шул якка китәме?
Сагышлы ирендә
мәҗүси җил тәме...

Чарасыз бадәмнәр
бәс кебек чәчәктә.
Җил белән китәсе,
яз булып килсәк тә...
 


Көзге диңгез


Учларымда – диңгез кабырчыгы.
Зәңгәр соңсызлыкның энҗе чагы...

Мәрҗән урманнарын иңләп үскән
Диңгез кызларының уенчыгы.

Кабырчыкны колагына куеп
Диңгез тыңлый
улым-кыланчыгым...

Көзгә кердек.
Җиләс... җылы... хозур...
Ерактагы авазларның чыңы...

Диңгез шаулый... Аера белсәк
Кабырчыкта булганыннан чынын!..
 

Яңгыр явар...

Яңгыр явар, эрбетләрне чылатып,
Сәрбиләргә тагып тамчы-алкасын...
Йөрәгемне сулкылдатып, елатып,
Яңгыр явар... Айлар, еллар...
Бер гасыр!

Яңгыр явар...
Юк, жәлләмәс ул мине!
Әллә илдә, әллә читтә – барыбер...
Тик исемә төшерер дә илемне,
Яңгыр явар... Айлар, еллар...
Бер гомер!

Яшь килен күк таулар өрткән
бөркәнчек,
Зәйтүнлектә шашып-шашып
кош сайрый!..
Бурычка дип алган
сулыш беткәнче
Явар яңгыр –
сагыш кебек гел сары...

 

*  *  *

Юллар инде ялыктырып бара, элеккечә җилкенми күк күңел.
Юллар инде күктән җиргә таба, элеккечә җирдән күккә түгел...

Күңел инде чишмәләрдән кичеп, – дәрьялардан, диңгезләрдән
эчкән!
Җан агачым пешкән җимешләрен сыгылып ла күтәрәдер көчкә...

Идел-йортта, Хәзәр, Акдиңгездә шагыйрьләргә илһам биргән
күзләр, –
Алар гына һаман мөлдерәмә...
һаман сусар, һаман сөю эзләр!

 

*  *  *

Җил эленгән нечкә талга:
Менә егылып төшәр...
Әйтерсең лә керфегемә
Эленгән шомлы төшләр.

Ай эленгән зәңгәр күккә:
Ярылыр сыман бишкә...
Әйтерсең лә күкрәктәге
Алмалар... тулып пешкән.

Чык эленгән ап-ак гөлгә:
Күтәрә көчкә-көчкә.
Әйтерсең лә бәгыремнән
Шигырь өзелеп төшкән.

фото: pixabay.com
 

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Төркәлү
Cимвол калды:
Реклама
Хәзер укыйлар
  • Татар гаиләсе / килен-кайнана
    «Таккан белән теккән кебек без...» – Кайнана белән ничек торасың син? Минем сыман гомер буе бием белән яшәгән, башкалар кайнаналарын сөйләгәндә сүзгә кушылмаган кешегә бу сорауны бик еш бирәләр. Җавабым гел бер була минем: – И-и, рәхәт бит аның белән! – дим. Чын күңелдән әйтәм! Бер риясыз...
    4553
    11
    115
  • Күңелеңә җыйма
    Гомерем усал кайнана, исерек ир белән үтте 8   Рәфис тә, кайнатам да туасы баланың малай булуын  бик тели иделәр.  Ирем: «Малай тусын, Алладан сорап дога кыл әле», – дип, авылдагы сукыр Фәния карчыкка сәдака да илтеп бирде. Ул заманда туасы баланың кызмы, малаймы икәнен алдан белеп булмый иде шул...
    13169
    2
    90
  • Татар гаиләсе / килен-кайнана
    «Ирең яратсын дисәң, кайнанаңны ярат» – Бу – төп нигез. Ишле гаилә! Эшле гаилә! Монда килгән-киткән кеше дә бик күп булыр. Ә син шушы йортның хуҗабикәсе булырсың! Әнинең – кайнанамның туйда әйткән бу сүзләре бүгенгедәй колагымда яңгырап тора. Ул көнне ишеткән теләкләрнең бик күбесе күптән онытылды, ә әнинекеләрне гомерлеккә хәтерләп калганмын. Матур тормышның башы шушы сүздән үк башлангандыр.
    2824
    9
    88
  • Күңелеңә җыйма
    Гомерем усал кайнана, исерек ир белән үтте 11 Көн артыннан көн, ай артыннан ай узды. Икенче балама көмәнле вакытымда без, кайнана белән кайната яшәгән йорттан башка чыгып, үз йортыбыз белән яши башлаган идек...
    11324
    13
    75
  • Күңелеңә җыйма
     Гомерем усал кайнана, исерек ир белән үтте 10  Мин, иремне уятмаска тырышып, куенымда мыш-мыш килеп йоклаган баламны саклык белән агач караватка китереп салдым. Өстемдәге пальтомның төймәләрен чишеп, чөйгә өлдем. Урамда апрель башы булуга карамастан бик суык иде шул, кар да эреп бетмәгән. Салкын төндә печән өстендә баламны кысып кочаклаган килеш төн кундым бит.
    13778
    4
    73
Реклама
Соңгы комментарийлар
Реклама
Фотогалерея
«Татар мамык шәле» бренды нәрсә ул?
«Татар гаиләсе / үрнәк алыгыз»
«Азат хатын» күргәзмәсе – Кабан күле буенда
«Сөембикә»нең яңа саны һәм... балчык
Әлфия Миңнуллина: «Әни Казанга яланаяклы кыз булып килгән иде, яланаяк мәңгелеккә китеп бара...»
Фарфор буенча рәссам Римма Газалиеваның шәхси күргәзмәсе
Укучыга таба яңа адым: «Сөембикә»нең февраль санын тәкъдим иттек 
Венера Ганиеваның ире, тавыш режиссеры Камил Фәйзрахмановны соңгы юлга озату
Беренче дулкын. Өмет, курку, хисләр
Татарстан журналистикасы тарихы – фотоларда
Барлык язмалар
© 2011 - 2022. Сөембикә. Все права защищены.
© ТАТМЕДИА. Все материалы, размещенные на сайте, защищены законом.
Перепечатка, воспроизведение и распространение в любом объеме информации,
размещенной на сайте, возможна только с письменного согласия редакций СМИ.
При поддержке Республиканского агентства по печати и массовым коммуникациям «ТАТМЕДИА».
Наименование СМИ: Сөембикә
№ свидетельства о регистрации СМИ, дата: Эл № ФС77-67913 от 6.12.2016 г.
выдано Федеральной службой по надзору в сфере связи,
информационных технологий и массовых коммуникаций
ФИО главного редактора: Маликова Лариса Николаевна
Адрес редакции: 420066, г. Казань, ул. Декабристов, д. 2
Телефон редакции: (843) 222-09-77
E-mail редакции: suumbike@tatmedia.com, ssuum@yandex.ru
Для сообщений о фактах коррупции suumbike.dir@tatmedia.com
Учредитель СМИ: АО «ТАТМЕДИА»
Политика о персональных данных
Антикоррупционная политика
Телефон АО «ТАТМЕДИА»: (843) 222 09 84
Яндекс.Метрика
16+