​Дымлы күзләрдә – алсу таң

Әлфия Ситдыйкова – соңгы елларда иң актив иҗат итә торган шагыйрәләребезнең берсе. Бер-бер артлы Чаллы нәшриятында дөнья күргән «Җанда кабынган учак», «Назга сусау» шигырь җыентыклары аша укучы аны танырга өлгергән иде. Венера Хәмидуллина белән берлектә әзерләнгән «Туган якның ике чишмәсе» китабы (Татарстан китап нәшрияты) Әлфия Ситдыйкованы тагын бер яктан – тәрҗемәче буларак та ачты. Бу китап шуның белән кызыклы – шагыйрәләр бер-берсен тәрҗемә итәләр, шигырьләр ике телдә басылган.

Әлфиянең шигърияте ихласлыгы, мәхәббәтне романтик югарылыкка күтәрүе белән күңелне яулый. Чаллының «Күңел» радиосында ул алып бара торган тапшырулар да гамьле моң белән өртелгән.
 

* * *

Сагынганда тулган айга карыйм, –
Ай күзендә синең күзләрең. 
Ай нурына сыенып каршылыйм мин 
Якынлашкан гомер көзләрен.

Юксынганда татлы сүзләреңне, 
Бирелеп тыңлыйм былбыл 
                                      тавышын, – 
Былбылларны сайратырлык моңга 
Кушып тәкъдир язган язмышым.

Сандугачлар җырга салган 
                                      моңнан 
Өзелә тагын кемнәр үзәге?! 
Күзгә түгел, йөрәгемә бага 
Сагыш тулы дөнья күзләре.

 

* * *

Соңгы кат назланып кочакта 
Үксегән сабыйдай боегып, 
Кара җир өстенә түшәлә 
Алтындай яфраклар коелып.

Соңгы кат каңгылдый кыр казы, 
Иңрәвен яшереп йөрәккә. 
Үксеми китүләр илеңнән 
Авыр шул, авыр шул бигрәк тә.

Соңгы кат борылып карадың, –
Ялвару яшереп күзеңә. 
Пышылдыйм: 
«Сак белән Сок бүген 
Дөньяда без генә, без генә...»

 

* * *

Дөреслекнең йөзе нинди була, – 
Балкый микән якты кояш төсле. 
Әллә инде чагыла дөньялыкның 
Гасырлардан җыйган сагыш төсе? 
Дөреслекнең тәме нинди була, – 
Татлыракмы пешкән алмалардан?
Әллә инде бөтен дөньялыкның 
Хәсрәт ачыларын җыеп алган. 
Дөреслекне табып була микән... 
Дөреслекне танып була микән...

 

Канаты көйгән күбәләк

Ник күрсәттең миңа бәхет илен,
Ник тибрәттең татлы хыялда?
Киттең. Калдым, яралы кош сыман,
Ишелергә әзер кыяда.

Белмәгәндә җирдә оҗмах барын
Яшәү башка иде, үзгәрәк.
Очып китте иңнән бәхет кошым,
Мин – канаты көйгән күбәләк.

Ник яраттың, нигә яраттырдың,
Нигә салдың газап утына?
Күктә кояш балкып елмайса да,
Җылы керми хәзер йортыма.

Үз кояшың, үз йолдызың сүнсә,
Адаштыра язмыш юлларда.
Кайт яныма, кайтар бәхетемне,
Бирә күрмә чит-ят кулларга.

Татар хатын-кызлары өчен кызыклы язмаларны Сөембикә Telegram-каналында укыгыз


Ошый
Поделиться:
Комментарийлар (0)
Cимвол калды:
Хәзер укыйлар
  • Бозым Сихерчеләр, имчеләрне никтер картаеп-бирчәеп беткән карчыклар кыяфәтендә генә күзаллый иде моңарчы Галия. Аларның яшәгән йорты да каядыр бер читтә, аулакта булырга тиеш иде кебек. Ул йорт үзе үк күңелдә шик уятырга, шом кертергә тиеш...  Ачык йөзле, ак яулыклы апа каршы алды аларны.
    8438
    1
    108
  • 8875
    2
    58
  • Ялгыш очрашу Инде ничә ел үткән, әмма аны күргән саен, атлап барган җирдән адымнарын әкренәйтә, йөзенә иңгән гаепле елмаюын махсус җыерылган кашлары астына яшерергә тели. Оныта алмый бугай шул...
    9842
    1
    56
Реклама
Соңгы комментарийлар
  • 30 сентябрь 2020 - 09:42
    Без имени
    Шамсия ярата белмэгэн,анламыйда яратунын ничек булганын.
    Парлы ялгызлар
  • 30 сентябрь 2020 - 15:34
    Без имени
    Аңлашылмады. Ире белән язылышмыйча яшәгәннәрмени? ЗАГСка барабыз дигән.
    Күз белән каш арасы...
  • 30 сентябрь 2020 - 16:46
    Без имени
    Ике тиле...
    Парлы ялгызлар
  • 29 сентябрь 2020 - 20:37
    Без имени
    Шундый матур язылган!Укыйсы да укыйсы гына килэ!
    Яшел кар
  • 28 сентябрь 2020 - 10:18
    Без имени
    Гел белмэсэ бик эйбэт. Бер ачуланышканда йорэк озгеч сузлэр ишетэсегез килмэсэ белдермэгез. Иргэ таянган иделгэ таянган дилэр. Таяк та бер ата. Гомер озак.
    Аналыгыңны алганнарын иреңә әйтергәме, юкмы?
Реклама
Татарстан журналистикасы тарихы – фотоларда
Бу – безнең уртак тарихыбыз
Журналыбыз архивыннан
«Объективта – әни»
Кешелек хакында фәлсәфи уйланулар, робот София һәм ипи
Балачак – уйнар чак...