Юкә чәчәгенең ун шифалы үзлеге

Урамнарда искиткеч хуш ис! Юкәләр чәчәк аткан! Балачакта салкын тидерсәк, әниләр юкә чәчәге кайнатып эчертә иделәр. Без аны салкын тигәннән генә эчәсе дип беләбез, ә ул әллә ничә төрле чирдән шифа бирә. 

• Юкә чәчәгенең ялкынсынуны басу үзлеге көчле. Яман шешләрне кисәтүче дәва буларак кулланылуы да нәкъ шуның белән аңлатыла. Моннан тыш, юкә чәчәге менә дигән антиоксидант. 
• Без юкә чәчәген күбесенчә салкын тигәннән дәва буларак кулланабыз. Чынлап та, юкә чәчәге температураны төшерә, бу аның тирләтү үзлеге белән бәйле. ОРВИ, ОРЗ авыруларыннан тизрәк савыгырга булыша. 
• Ул буыннар сызлавын, невралгия, неврит, ашказаны җәрәхәтен дәвалаганда да өстәмә чара буларак кулланыла. 
• Ычык (цистит), бронхит, стоматит, ларингитны дәвалау өчен дә юкә чәчәген кулланырга мөмкин. Авыз эче бозылганда, тамак шешкәндә, юкә чәчәге төнәтмәсе белән авызны, тамак төбен чайкыйлар. 
• Үт куыгы, бөерләр начар эшләгән кешеләргә дә юкә чәчәге чәен эчәргә киңәш ителә, чөнки ул үт кудыру, бәвел кудыру көченә ия. 
• Юкә чәчәге тән тиресен дә яшәртә, битнең төсен матурлый. 
• Ул тынычландыра, стресс вакытында организмның көчен арттыра, кан басымыннан саклый –  гипертоник кризларны булдырмый калырга ярдәм итә. 
• Юкә чәчәген киптереп, чәй кебек төнәтеп эчәләр. Бал белән эчкәндә дәва көче тагын да ныграк сизелә. 
• Ләкин үләннәргә аллергия булганда, юкә чәчәге белән мавыкмаска кирәк. Аннары аны ел дәвамында өзлексез эчү дә тыела, табигый булса да, юкә чәчәгендә бик көчле химик матдәләр бар.