Ни өчен Зөһрә Шәрифуллина туган көнен ике тапкыр бәйрәм итә

Сезнең игьтибарга Зөһрә Шәрифуллинаның тормыш юлыннан берничә кызыклы факт. 

Зөһрә ханым туган көнен ике тапкыр бәйрәм итә. Берсе – дөньяга чынлап та туган көне – 1956 елның 20 декабре, икенчесе – туу таныклыгына теркәлгәне –  1957 елның 7 мае. Җырлы-моңлы Сарманда, күп балалы гаиләдә туа ул. 

Музыка мәктәбенең баян классында укый, бик яхшы итеп баянда уйный. Сарман урта мәктәбенең сигезенче сыйныфын тәмамлагач, Түбән Кама шәһәренең музыка училищесына укырга керә. Ләкин бу чор – алар гаиләсе өчен бик авыр чор була. Кинәт кенә әтисе, аннары абыйсы вафат булганнан соң булачак җырчы укуын калдырып, әнисе янына кайта. 

Сарманда яшәгәндә «Татарстан» колхозында эшли. Аның җырлаганын һәм баянда уйнаганын балалар бакчасы мөдире ишетеп, Зөһрәне балалар бакчасына музыка укытучысы итеп чакыра. Шулай итеп, аңа бер ел балаларны җырларга, биергә өйрәтергә дә туры килә.

Ә укуын соңыннан барыбер дәвам итә ул – Түбән Каманың Салих Сәйдәшев исемендәге музыка училищесын тәмамлый. Ләкин имтиханнарны тапшырганда бер «казус» килеп чыга – русчасы начар булганлыктан, тарихтан  имтиханны тапшыра алмый. Булмады инде, дип кайтып, клубка эшкә керсә, көзен: «Тарихтан имтиханны кабат тапшырырга чакырабыз», дигән хат килеп төшә. Имтихан соравын ул татарча җавап бирә, ә аның сөйләгәнен училище директоры үзе урысчага тәрҗемә итеп бара. 

Зөһрә Шәрифуллинага иң зур популярлыкны «Су буенда учак яна» җыры алып килә. Наил Касыймов белән Зөфәр Хәйретдинов язган җыр ул. Ике дистә елдан артык бу җырны бары тик Зөһрә Шәрифуллина гына җырлый. Ә менә аның репертуарыннан булган «Нигә яна йөрәгем?» җырын хәтта Надежда Бабкина да башкара. 

Җырчының «Аккош канат кагына»  җыры да бик популяр булды. Бу җырны аңа Марсель абый Гыймазетдинов махсус яза. Музыкасы – Сәфьян Ибраһимовныкы.  Марсель абый Гыймазетдинов – Минзәләдә гомер буе колхоз рәисе булып эшләгән кеше. Зөһрә Шәрифуллина репертуарында аның  «Яшәргә дә әле яшәргә» дигән җыры  да бар.

Хезмәт юлын 1980 елда – Татар дәүләт филармониясендә башлап җибәрә һәм гомере буена филармониягә тугрылык саклый. Профессиональ сәхнәгә аны Илһам Шакиров алып чыга, алар бер төркемдә эшлиләр.  Илһам Шакировны үзенең укытучысы дип саный Зөһрә ханым. «Ул вакытта хезмәт хакы 4 сум 50 тиен. Тәүлегенә тагын 1 сум 50 тиен өстәп бирәләр. Илһам абыйның күлмәкләрен юам, аның өчен тагын 1 сум 50 тиен түләнә. Шулай итеп, аена 7 сум 50 тиенгә тула», – дип искә ала җырчы ул елларны. 

Узган ел җырчының яшьлек хатирәләре, истәлекләре, аның белән дөнья күргән әңгәмәләр, популяр җырлары кергән китабы басылып чыкты. Әлеге проектның җитәкчесе – җырчының ире Азат Хәлимов. Азат әфәнде дә баянчы, Татарстанның атказанган артисты. Ике уллары – Ринат белән Булатлары бар. 

Зөһрә Шәрифуллина башта – 130, аннары 150 җыры тупланган музыкаль альбом да чыгарды.