Тавыкларны ябарга! 

 Тиздән җылы якка киткән кошлар кайта башлый. Алар  белән бергә республикага кош-корт  өчен куркыныч вирус та килүе мөмкин. Кош гриппы  Татарстанда юк. Әмма  якын чит илләрдә  теркәлгән очраклар бар. Шуңа күрә ветеринарлар чарасын күрергә киңәш итә.  

2018 елда Лаеш кошчылык фабрикасында кош гриппы чыгып, бик күп  мәшәкатьләр, чыгымнар китереп тудырды. Узган ел республикада вирус очраклары теркәлмәде. Быел да әлегә тыныч. Ә менә Россиянең Чиләбе өлкәсендә кош гриппы вирусы теркәлгән. Министрлар Кабинеты баш ветеринария Идарәсе башлыгы урынбасары Габделхак Мотыйгуллин сүзләренчә, Татарстанның 35 районында бу төбәктән сатуга килгән йомырка булган. Аларны алып  тикшергәннәр. Татарстанга терәлеп торган Башкорстан Республикасының Туймазы районы кошчылык  фермасында да  кош гриппы вирусына шик булган, тик ул расланмаган.   

Белгечләр җылы якка киткән кошларның кайтуын хәзер шомланып көтеп тора. Алар белән бергә вирус та килергә мөмкин чөнки. Шуңа күрә хуҗалыклардагы кош-кортларны саклап калу өчен, чарасын алдан күрергә киңәш итәләр. Ишегалдында табагы белән торган азыкка төшкән кошлар – вирус чыганагы булырга мөмкин.  Кош-кортларны ябып асрарга киңәш итәләр. Бигрәк тә яз айларында.   

Хәзер авыл халкы чебеш, каз-үрдәкләр сатып ала башлый. Габделхак Мотыйгуллин  бу эштә аеруча сак булырга киңәш итә:  «Урамнарга килеп кош-корт белән сату итүчеләрдән ветеринар белешмәләре булу-булмавы хакында сорауның ояты юк, киресенчә – үз кошларыгызны һәм акчаларыгызны сакларга бер чара гына», – ди. Моннан кала, сату иткән машинаның номерын фотога төшереп калу да гаеп эш түгел. 2018 елда Апас, Кайбыч якларында кош гриппы таралган вакытларда, хуҗалык ияләренең каз-үрдәкләрен хәтта кемнән сатып алганын белмәүләре ачыкланган. 

Алган чебешләр бер-бер артлы үлә башлый икән, бу хакта кичекмәстән ветеринария хезмәткәрләренә хәбәр итәргә кирәк.