«Сайлауда «үле җаннар» булу-булмавын тикшерәбез»

Татарстанның күзәтүчеләр корпусы бүлекчәсе сайлауга 2817 күзәтүче әзерләгән

«Чиста сайлаулар өчен» күзәтүчеләр корпусының ТР буенча координаторы, ТР Иҗтимагый палатасы комиссиясе рәисе Илнар Гыйрфанов сайлауда күзәтүче булып эшләячәк кешеләрне 2017нче елның декабрь аенда ук өйрәтә башлаганнарын әйтте. Аларга сайлау участогында үзеңне ничек тотарга икәнлеге аңлатылган. Районнарга чыгып, күзәтүче булып эшләячәк кешеләр белән шәхсән дә очрашканнар.
Илнар әфәнде әйтүенчә, һәр сайлау участогында күзәтүче бар. Татарстанда барлыгы 2817 күзәтүче эшли. Кагыйдә бозылу күрсәләр, алар шундук ситуацион үзәккә хәбәр итә. Шулай ук һәр сайлаучыт да закон бозылу турында күзәтү штабларына хәбәр итә ала. Илнар Гыйрфанов белдерүенчә, барлыгы өч шикаять кабул ителгән булган. Берәү сайлау участогында камераның дөрес урнаштырылмаган булуы хакында җиткергән. Күзәтүчеләр камераны дөресләп куйган. Бөгелмәдә урнага күпләп бюллетень ташлау очрагы турында хәбәр алынган. Хәбәр итүче видео да җибәргән. «Бер кеше бюллетенен урнага салмакчы булган, тик кәгазь кысылып калган. Икенче кеше аны үз бюллетене белән төртеп төшермәкче булган – ул да кысылып калган. Хәбәрне җибәргән кеше шушы күренешне күпләп бюллетень ташлау дип кабул иткән. Чынлыкта, бернинди закон бозу да юк. Теләгән һәр кеше бу видеоны интернетта карый ала», – дип белдерде Илнар Гыйрфанов.
Ул шулай ук сайлауда «үле җаннар» булмавын тикшерүләрен, 17нче март көнне тынычлык көненең дөрес үтү-үтмәвен дә тикшерүләрен әйтте. Күзәтүчеләр соңгы беркетмә тутырылганчы сайлау участокларыннан китмәячәк.

Следите за самым важным и интересным в Telegram-каналеТатмедиа