Рөстәм Миңнеханов “Мәктәпкә җыенырга ярдәм ит” хәйрия акциясендә катнашырга өнди

Бүген бу хакта Татарстан Министрлар Кабинетында “Мәктәпкә җыенырга ярдәм ит” хәйрия акциясен уздыруга багышлап үткәрелгән брифингта ТР Президенты ярдәмчесе Ләйлә Фазлыева хәбәр итте.

Спикер сүзләренчә, беренче класслардан тыш, 2-11 нче класс укучыларының 14,4 меңләбенә, шулай ук, ярдәм күрсәтү планга кертелгән. Быел республика күләмендәге “Мәктәпкә җыенырга ярдәм ит” хәйрия акциясе Татарстанның Югары Ослан, Яшел Үзән районнарында һәм Казанның Киров районында башланган.

Л.Фазлыева искәртеп үткәнчә, бу акция Татарстанда инде 2007 елдан бирле үткәрелә. Ул ТР Президенты Рөстәм Миңнеханов һәм Хәйрия эшчәнлеге мәсьәләләре буенча республика советы башлангычы белән гамәлгә кертелгән.

Моңа кадәр, ягъни 2007 елдан 2015 елга кадәр республиканың белем бирү учреждениеләрендәге 150 меңнән күбрәк балага барлыгы 234 млн сумлык ярдәм күрсәтелгән.

«Акция яңа уку елына әзерләнгәндә мохтаҗ булган бөтен балага да булышуны күздә тота. Матди яктан аз тәэмин ителгән гаиләләрдәге балалар яки сәламәтлеге буенча физик чикләнгән ата-аналар, шулай ук гаиләгә алынган балалар яңа уку елына мәктәп кирәк-яраклары салынган портфельләр ала”, - дип искәртте ТР Президенты ярдәмчесе. Мәктәп балаларына шундый бүләкләр гадәт буенча Татарстан Республикасы көне, Белем көне, район бәйрәмнәре кебек башка зур күләмле чаралар барышында тапшырыла, дип өстәде ул.

Ләйлә Фазлыева сүзләренчә, Татарстан Президенты хуплаган “Мәктәпкә җыенырга ярдәм ит” акциясе халык арасында һәрвакыт зур яңгыраш ала. “Рөстәм Миңнеханов предприятиеләр, учреждениеләр җитәкчеләренә, шулай ук битараф булмаган татарстанлыларга балаларга ярдәм күрсәтергә чакырып мөрәҗәгать итте. Анда катнашу вариантлары төрле булырга мөмкин. Мисалга, якында гына яшәгән балага укучы портфеле, мәктәп яки спорт костюмы, уку өчен теләсә нинди кирәк-ярак бүләк итәргә була”, - диде ул.

Шулай ук, ТР Президенты йөкләмәсенә ярашлы рәвештә, 11 августта Анападагы “Витязево” лагерендагы янгында каза күргән балаларның барысына да ярдәм биреләчәк. “Хәзерге вакытта хәйрия ярдәме күрсәтү буенча эш башланды инде. Бүгенгә булган белешмә буенча, Балык Бистәсе районында шундый 14 бала исәпләнә, Лаеш районында – 5, Чистай һәм Тукай районнарында – 2шәр, Саба һәм Әлки районнарында – 1әр. Аларга финанс ярдәм күрсәтелә”, - дип ачыклык кертте спикер.

“Мондый ярдәм алу мөмкинлеге турында районнарның башкарма комитетларында, социаль яклау бүлекләрендә, район мәгариф бүлекләрендә белешергә була. Хәйрияче булырга һәм мохтаҗларга булышырга теләгәннәр “Ак Барс Созидание” фондына һәм муниципалитет хакимиятенә мөрәҗәгать итә ала”, - дип сүзен тәмамлады ТР Президенты ярдәмчесе Л.Фазлыева.

Республиканың “Мәктәпкә җыенырга ярдәм ит” хәйрия акциясе исәп-хисап реквизитлары: Благотворительный фонд «АК БАРС СОЗИДАНИЕ». ОГРН: 1061600052425. ИНН/КПП: 1658079690/165701001. Р/с: 40703810100020000999 в ОАО «АК БАРС» БАНК. БИК: 049205805. Корреспондентский счет: 30101810000000000805. Назначение платежа: «Помоги собраться в школу».

сылтама - http://tat.tatar-inform.ru