Беренче татар уен фильмы саналган “Булат батыр” киң җәмәгатьчелеккә, 88 елдан соң, кабат тәкъдим ителә

Беренче тапкыр аны тамашачылар “Электра” кинотеатрында караган булган
27 май көнне, ягъни иртәгә Казан Кремленең “Манеж” күргәзмәләр залында беренче татар уен фильмы —“Булат батыр” киң җәмәгатьчелеккә, 88 елдан соң, кабат тәкъдим ителәчәк. Чарада “тере” музыка яңгыраячак.

Фильмның премьерасы 1928 елның 22 февралендә Казанның “Электра” кинотеатрында булган. Бу Казанда моңа кадәр төшерелгән киноларның иң зурысы саналган.

Драманың нигезендә Пугачев күтәрелешләре вакытында качкыннарның башлыгы Булат батырның шәхси драмасы ята. Фильмның әдәби сценариен Габдрахман Шакиров язган. Режиссер ассистенты ролендә, киләчәктә документаль фильмнар төшергән татар режиссеры Каюм Позняков була. Картинаның режиссеры исә − Юрий Тарич, операторы – Григорий Гибер, дип хәбәр итә “Казан Кремле” музей-тыюлыгы матбугат хезмәте. 
сылтама: http://tat.tatar-inform.ru